Sámediggi lea fuolastuvvan go eanet ja eanet bohccot vuddjojit togaide Nordlándageidnosis.
Dieđihuvvo ahte dát lea stuorra ekonomalaš vahágin boazodollui ja ahte garrasit roasmmohuvvan eallit gillájit sakka go váldá guhkes áiggi ovdalgo dat heakkahuhttojuvvojit. Dát dáhpáhusat sáhttet maid leat váralaččat togamátkkošteaddjiide.
-Dát vahágat leat noađđin boazoeaiggádiidda, sihke persovnnalaččat ja ekonomalaččat. Lea váigat oaidnit go eallit gillájit guhká ovdalgo vižžojuvvojit ja heakkahuhttojuvvojit, dadjá ráđđelahtu Ellinor Marita Jåma.
Sámediggeráđđái lea dehálaš ahte fargga čađahuvvojit doaibmabijut mat dagahit ahte eai vuddjo nu ollu bohccot. Danne áigu sámediggeráđđi váldit oktavuođa johtolatministariin Magnhild Meltveit Kleppain ášši birra.
-Okta čoavddus lea áidut dákko gokko vuddjojit eanemus bohccot, lohká Jåma.