- Mun háliidan ahte galgá leat vejolaš roggat minerálaid sámi guovlluin vaikke vel minerálaláhka ii fuolat sámi beroštusaid ja vuoigatvuođaid doarvái bures, dadjá Sámedikki presideanta Egil Olli.
Gulaskuddannotáhtas mii evttohit mo mii sáhttit dán ollašuhttit nu ahte mii sihke sihkkarastit ahte árvoháhkan boahtá buorrin sámi kultuvrii ja báikegottiide, ja ahte dakkár doaibma ii duvdde eret árbevirolaš ealáhusaid. Jus Sámedikkis ii leat politihkka dasa, de mii beahttit sámi álbmoga ja báikegottiid, dadjá Olli.
- Mun lean ságastallan sihke ráđđehusain ja sámi ásahusaiguin evttohusa birra ja mun dovddan dan ahte lea stuorra áddejupmi das ahte Sámedikkis fertejit leat njuolggadusat jus mis galgá leat njuolgga oktavuohta minerálafitnodagaiguin go guoská doaibmavejolašvuođaide sámi guovlluin.
"Njuolggadus"-evttohusas dakkár oktavuhtii rávvejuvvo šiehtadallat soahpamuša gaskal Sámedikki, guoskevaš sámi beroštusaid ja minerálafitnodagaid doaimmaid birra sámi guovlluin.
- Ollugat leat várra roahkkasan min "njuolggadusat" doahpagii ja dasa ahte evttohus orru leamen láhkamuddejeaddjin. Dat ii leat goassege leamaš áigumuššan. Danne áigut earret eará árvvoštallat doabageavaheami go ráhkadit minerálapolitihkkaevttohusa Sámedikki dievasčoahkkimii, dadjá Olli.
- Sávan ahte buohkat servet áššálaš gulahallamii ja buktet ráhkaduslaš evttohusaid, vai mii sihkkarastit boahtteáiggi sihke sámi kultuvrii ja báikegottiide, loahpaha Sámedikki presideanta Egil Olli.