Disdat čoahkkin lei vuosttaš lávki lagat ovttasbargui gaskal Finnmárkku seniorráđi ja Sámedikki. Jurdda lea ahte goappašat bealit galget beassat ovddidit evttohusaid sihke go fylkkaplána boarrásiid várás ráhkaduvvo ja go Sámedikki boarrásiidpolitihkka hábmejuvvo.
- Lean hui ilus go mis šattai čoahkkin Finnmárkku seniorráđiin mas beasaimet ságastallat dakkár áššiid birra mat beroštahttet Finnmárkku boarrásiid. Boarrásiidráđi evttohus šaddá deaŧalaš Sámedikki boarrásiidpolitihka viidáset hábmemii, dadjá Sámedikki várrepresideanta.
Maiddái Finnmárkku seniorráđi jođiheaddji, Nils Einar Mathisen, lea duhtavaš čoahkkimiin Kárášjogas.
- Mii boarrásiidráđis leat hui ilus go leat ožžon oktavuođa Sámedikkiin. Min mielas lea sihke deaŧalaš ja riekta go Sámediggi áigu min searvvahit boarrásiidpolitihka hábmemii. Dát gulahallan lea midjiide ođas ja mii leat hui duhtavaččat go beassat ovddidit oainnuideamet Sámediggái.
Resursa
Sámediggi háliida oainnusin dahkat ahte sámi boarrásat leat deaŧalaš resursan servodahkii, juoga mii čielgasit boahtá ovdan ráđi politihkalaš álginjulggaštusas. Várrepresideanta Laila Susanne Vars deattuha deaŧalažžan ahte boarrásat adnojuvvojit resursan ii dušše árbedieđuid oktavuođas, muhto maiddái go lea sáhka politihka hábmemis.
- Sápmelaččaid gaskkas lea boarrásiin álo leamaš deaŧalaš sadji servodagas, ja Sámediggi háliida gulahallama erenoamážit sámiid boarrásiiguin dakkár politihka hábmemis, man ulbmil lea fuolahit boarrásiid beroštusaid. Boarrásat leat deaŧalaš resursa, ja sihke mánáidgárddit, skuvllat ja Sámediggi, politihkalaš ja hálddahuslaš orgánan, berrešedje ollu eanet ávkkástallat sin máhtuin.
Gulahalli fylkka seniorráđi bealis: Bjørnar Simonsen, Finnmárkku Fylkkagielda.