Sámediggi lea guhkit áiggi ovddidan balu go smávva giliskuvllat čađat áitojuvvojit heaittihuvvot, ja bivddii loahpas 2009 hoahppočoahkkima njeljiin ministariin vejolaš skuvlaheaittihemiid guovllupolitihkalaš váikkuhemiid birra. Stáhtaráđđi Rigmor Aasrud čuovvolii dan ášši ja bovdii Sámedikki dán čoahkkimii departemeanttaiguin, gos maiddái Gielddasuorggi beroštus- ja bargoaddiorganisašuvdna (Kommunesektorens interesse- og arbeidsgiverorganisasjon (KS)) lea bovdejuvvon searvat.
Sámedikki várrepresideanta Láilá Susanne Vars ballá ahte smávva báikkálašservodagat báhcet ávdin báikin go suohkaniin ja fylkasuohkaniin eai leat resurssat bisuhit giliskuvllaid vuođđo- ja joatkkaskuvladásis.
- Mii oaivvildit ahte skuvlaheaittihemiid ferte geahččat viidát servodatperspektiivvas danne go dat čuhcet garrasit báikkálašservodagaide dan bokte ahte dat mielddisbuktá eretfárremiid sámegiela ja sámi kultuvrra dehálaš resursaguovddážiin.
Smávva sámi báikkálašservodagat leat buorit arenat sámegiela, sámi kultuvrra ja servodateallima seailluheapmái, ja giliskuvllat leat dávjá smávit giliid eallinvuođđu. Jus skuvllat heaittihuvvojit, de dat mielddisbuktá eretfárremiid nanu sámi servodagain, ja dat lea áittan olles guovllu sámi kultuvrii.
Otná čoahkkimis áigot earret eará digaštallat vejolašvuođaid ásahit sierra ekonomalaš ortnegiid sámi giliskuvllaid seailluheapmái.