Dá lea sámediggeráđi Marianne Balto sáhkavuorru Gollevirggi prošeavtta áŋgiruššama álggaheami oktavuođas:
Sámediggi lea válljen searvat "Gollevirgi" joatkimii. Dannego das ledje buorit bohtosat mannan jagi.
Sámi servodat dárbbaša eanet oahpaheaddjiid mánáidgárddiide ja skuvllaide.
Mánáidgárddit ja skuvllat leat dehálaš ásahusat mat min mánáid bokte dolvot sámi gielaid ja kultuvrra viidáseappot. Dát ásahusat leat šaddan ain deháleappot dál go bearašstruktuvrrat lea rievdan ja máŋggagielat bearrašat dárbbašit gielladoarjaga almmolaš deaivvadanbáikkiin.
Ollugat háliidit váldit ruovttoluotta sámegiela. Dat lea buorre.
Buot mii lea namuhuvvon dagaha ahte sámi servodat dárbbaša oahpaheaddjiid geain lea máhttu sámegielas ja sámi servodatdiliid birra.
Nuorat geat váldet oahpaheaddjioahpu šaddet min boahtteáiggi geađgejuolgin.
Dakkár oahpaheaddjiid haga, geat sáhttet oahpahit sámegielas ja sámegillii, ii ovdán sámi servodat nu mo mii háliidit.
Sámediggi lea ásahan ođđa stipeandaortnega sámegiela álginkurssa várás vai sii, geat eai leat sámegielagat, maiddái ožžot vejolašvuođa duddjot giellagelbbolašvuođa. Dakko bokte ožžot eanebut vejolašvuođa álgit dakkár dábálaš ohppui, mii čađahuvvo sámegillii.
Dat ahte eanet sámi nuorat čađahit alit oahpu, lokte gelbbolašvuođa ollu surggiin sámi servodagas.
Sámedikkis leat buorit stipeandaortnegat maiguin sáhttá ávkkástallat.
Loahpas ávžžuhan din ohcat ovdaskuvla - ja vuođđoskuvlaoahpaheaddjiohppui.
Dii sáhttibehtet leat mielde ealáskahttimin ja ovddideamen sámegiela mii ollu guovlluin lea áitojuvvon. Sávan ahte ollugat dis dustebehtet hástalusa ja ohcabehtet alit ohppui. Sávan didjiide lihku!
Sámedikki stipenddaortnegat