Sámediggi doallá dál goalmmát gearddi meahcástanseminára. Sámediggi vásiha lassáneaddji beroštumi mehciin ávkkástallamii vuođđun ealáhusovddideapmái. Oasseváldit leat sihke ealáhusaktevrrat ja eará berošteaddjit.
- Lassánan beroštupmi čájeha ahte lea vuođđu buoridit árvoháhkama meahci ektui, dadjá ráđđelahttu Marianne Balto.
Semináras lea guovddážis árvoháhkan, dadjá Balto. Sámediggi lea viežžan logaldalliid geain lea gelbbolašvuohta mehciin ávkkástallamis Suomas ja Ruoŧas. Teuvo Niva, guolástusbiologa, áigu hállat ealáhusguolástusa vásihusaid birra Davvi-Suomas.
- Deaŧalaš lea viežžat dán lágan gelbbolašvuođa, nu ahte mii sáhttit lonuhallat vásihusaid Davvi-Suomain, dadjá Balto.
- Mis lea maiddái leamaš lihkku go leat ožžon Laila Spik, Johkamohkis hállat urtasiid ja šattuid birra borramuššan ja dearvvašvuođabiebmun sámi kultuvrras. Gelddolaš fáddá mas lea stuorra ovdánanvejolašvuohta, erenoamážit vásihusvuđot mátkeealáhusaid ektui, cealká Marianne Balto.
Preassa bovdejuvvo searvat seminárii.