Sámi nuorat leat 2004 rájes oassálastán Arctic Winter Games:ii. Sii leat gilvvohallamiid bokte beassan searvat stuorra riikkaidgaskasaš valáštallanlágidemiide, gilvvohallat eará riikkaid ja kultuvrraid gilvvohalliiguin, ja beassan ovddidit iežaset kultuvrra ollu olbmuide hui positiivva vugiin.
Deaŧalaš kulturgaskkusteaddjit
Norgga, Ruoŧa ja Suoma beale sámedikkiide lea deaŧalaš movttiidahttit nuorra sápmelaččaid áŋgiruššat valáštallamiin alla dásis, sihke riikkalaččat ja riikkaidgaskasaččat.
Movttiidahttindoaibmabijuid bokte, buriid rámmaeavttuid bokte ja gulahallama nannema bokte gaskal sámedikkiid ja sámi valástallanservviid ja organisašuvnnaid, áigot sámedikkit čájehit ahte sámi valáštallanlihkadus lea deaŧalaš riikkarádjerasttideaddji ja maiddái riikkaidgaskasaš kulturgaskkusteaddji dakkár gilvvohallamiin go árktalaš dálvegilvvohallamiin.
Báras ovddasteaddjit
Sámediggepresideanta Egil Olli ovddasta Sámi parlamentáralaš ráđi Kanada gilvvohallamiin. Doppe son ovttastallá sámi nuoraiguin gilvvohallamiid oktavuođas, geige medáljaid, ja deaivvada gilvvohallamiid ovddasteddjiiguin.
-Lean hui ilus go nuppádis beasan ovddastit Sámi parlamentáralaš ráđi dan deaŧalaš dáhpáhusas mii Arctic Winter Games lea. Dat sámi nuorat geat oassálastet gilvvohallamiidda, leat sin álbmoga ja sámi valáštallanlihkadusa báras ovddasteaddjit, dadjá sámediggepresideanta Egil Olli.
-Dákkár stuorra gilvvohallanlágideapmái oassálastima bokte sii leat mielde duddjomin stuorát áddejumi eará kultuvrraide, stuorát áddejumi iežaset identitehtii ja sii čatnet ustitvuođabáttiid eará álgoálbmotkultuvrraid nuoraide. Dát lea vásáhus mii sin čuovvu olles eallima, ja mun Sámi parlamentáralaš ráđi ovddasteaddjin lean ilus go mii beassat leat mielde láhčimin dasa, dadjá sámediggepresideanta Egil Olli.