Dát lei goalmmát gearddi go Sámediggi lágida meahcástanseminára. Sámediggi vásiha stuorát ja stuorát beroštumi meahcceávkkástallamii vuođđun ealáhusovddideapmái.
-Dát lassánan beroštupmi čájeha ahte lea vuođđu lasihit árvoháhkama meahcis, dadjá ráđđelahttu Marianne Balto.
Oassálastiid dieđut ruovttoluotta leat leamaš buorit. Ollugat ealáhusa bealis dadjet ahte sii leat oahppan ollu go leat deaivvadan dutkiiguin, eará meahcásteddjiiguin ja eiseválddiiguin oktasaš semináras sámi guovlluid meahcceávkkástallama birra.
-Erenoamážit háliidan namuhit álggaheddjiid Suomas ja Ruoŧaš, geat muitaledje ahte lea vejolaš meahcceresurssaid vuođul fidnet ođđa bargosajiid, dadjá Balto.
-Mii doaivut ahte seminára movttiidahttá eanebui vuođđudit meahcástanfitnodagaid, dadjá ráđđelahttu Marianne Balto.
Seminárii oassálaste dutkit, gielddapolitihkkarat, departemeanttaid ovddasteaddjit, meahcásteaddjit Norggas, Suomas ja Ruoŧas.