Sámi vuoigatvuođalávdegotti II viidáset bargui lea deaŧalaš ahte Sámedikkis leat viiddis dieđut otnáš dili birra, ja lea deaŧalaš oažžut olbmuid oainnuid boahtteáiggi čovdosiidda.
- Oažžun dihte dáid dieđuid, lea deaŧalaš ahte mii guldalit daid olbmuid sámi guovlluin, mat guoskkahuvvojit. Buorit árvalusat álbmogis addet Sámediggái buoret vejolašvuođa olahit buriid bohtosiid boahttevaš konsultašuvnnain Ráđđehusain, cealká Sámedikki presideanta Egil Olli.
Sámi vuoigatvuođalávdegotti II evttohus earret eará kártenláhkaaddima birra lei čađačuovvu ságastallanfáddá ja olbmuid mielas oppalaččat lei dákkár láhkaevttohus buorre. Ieš evttohusas válddahallojuvvo individuála eaiggát- ja geavahanrivttiid identifiseren sámi guovlluin máttabealde Finnmárkku.
Evttohuvvon hálddašanmálle guoská loahppa-opmodahkii, mas lea sáhka stáhta opmodaga osiid birra mat eai guoskka priváhta individuála dahje oktasaš eaiggátriektái kárten- ja dohkkehanproseassas.
Guđe guvlui viidáseappot
Sámedikki presideanta Egil Olli deattuha ahte buot árvalusat mat bohte ovdan álbmotčoahkkimiin váldojuvvojit mielde bargui viidáseappot, ja ahte Sámediggi áigu maiddái maŋŋá álbmotčoahkkimiid váldit vuostá árvalusaid.
- Sámi vuoigatvuođalávdegotti II bargu viidáseappot lea lossa proseassa. Ja mii dáidit gártat konsulteret dán birra máŋggaid jagiid. Mii dárbbašit buriid árvalusaid oppa áiggi, eat dušše odne, dadjá Olli.
Eaktuduvvo ahte vuosttaš konsultašuvnnat Sámedikki ja Ráđđehusa gaskka dollojuvvot vuosttaš guovtti mánu áigge.