ONa erenoamášdieđiheaddji, James Anaya, galleda vuosttaš geardde historjjás Sámi regiovdna.
ONa erenoamášdieđiheaddji, James Anaya, (Rapporteur on the situation of human rights and fundamental freedoms of indigenous people) galleda Roavvenjárgga Sámis cuoŋománu 14-16 b. 2010.
Eanet dieđut James Anaya birra
Eanet dieđut ON erenoamášdieđiheaddji birra
Lea vuosttaš gearddi go ONa erenoamášdieđiheaddji virggálaččat galleda Sámi regiovdnan. Muđui lea dábálaš nu ahte erenoamášdieđiheaddji galleda juohke riikka sierra. Galledeapmi man boađus galgá leat almmolaš raporta, lágiduvvo konferánsan, ja jurdda lea ahte erenoamášdieđiheaddji deaivvadeami bokte sámedikkiiguin, Davviriikkaid ráđđehusaiguin, organisašuvnnaiguin ja ásahusaiguin galgá oažžut ipmárdusa das mo riikkat čuovvolit olmmošvuoigatvuođa konvenšuvnna.
Guorahallat riikkaid
ONa álgoálbmogiid erenoamášdieđiheaddji lea ONa álgoálbmotáššedovdi ja su bargun lea guorahallat mo riikkat čuovvolit riikkaidgaskasaš konvenšuvnnaid ja rávvagiid máilmmi álgoálbmogiid ektui. Erenoamášdieđiheaddji galgá suokkardit ja čuvget riikkaidgaskasaš soahpamušaid rihkkumiid, ávžžuhit ráđđehusaid guorahallat dihto dáhpáhusaid ja dieđihit ONa olmmošvuoigatvuođaráđđái.
Prográmma
Cuoŋománu 15. b. lágiduvvo beavdde birra ságastallan mas erenoamášdieđiheaddji deaivvada Sámi Parlamentáralaš Ráđiin (golmma sámedikki ja Ruošša beale sámeservviid áirasiiguin) ja ráđđehusaid áirasiiguin.
Čoahkkin lea rabas dárkojeddjiide ja mediai ja iešmearrideapmi fáddán galgá báidnit olles čoahkkima. Áigumuššan lea ahte iešguđet sámedikkit ja ráđđehusat galget beassat ovdanbuktit oainnuset čuovvovaš surggiid stáhtusii:
- Vuoigatvuohta eatnamiidda, čáziide ja luondduriggodagaide
- Giella, mánát ja nuorat čalmmustahtedettiin oahpu
- Davviriikkalaš sámekonvenšuvdna
Cuoŋománu 16. b. addá SPR organisašuvnnaid ja ásahusaid vejolašvuođa deaivvadit erenoamášdieđiheaddjiin vai besset muitalit mo sii oidnet dilálašvuođaid Sámis.
Áigumuššan lea čalmmustahttit bajábealde namuhuvvon fáttáid, muhto organisašuvnnat válljejit ieža maid sii váldet ovdan.
Juohke organisašuvdna oažžu vejolašvuođa ovddidit iežas ášši oanehaččat ja oažžu maiddái vejolašvuođa ovddidit gažaldagaid erenoamášdieđiheaddjái.
Erenoamášdieđiheaddji ávžžuhusa vuođul bivdá SPR organisašuvnnaid ovddidit áššiideaset čálalaččat ovdal konferánssa dahje konferánssas, mii álkidivččii erenoamášdieđiheaddji raportačállima.
Geavatlaš dieđut
Konferánsa álggahuvvo cuoŋománu 15. b. dii. 08.30 ja loahpahuvvo cuoŋománu 16. b. dii. 17.00 Roavvenjárggas, Suomas.
Jus dus leat gažaldagat, de váldde oktavuođa dáid olbmuiguin:
Anne Britt Hætta, anne.britt.heatta@samediggi.no, tel +47 911 11 788
Brita Stina Sjaggo brita@sametinget.se, tel +46 97117028
Rauna Rahko rauna.rahko@samediggi.fi, tel +358 50 577 5000