- Joatkkaskuvla Skániin lea hui deaŧalaš sámi giela ja kultuvrra suodjaleapmái ja ovddideapmái guovllus ja mii Sámedikkis šállošit go Sámediggi ii ožžon buoret vejolašvuođa váikkuhit fylkkadikki mearrádussii heaittiheami hárrái 2009:s, cealká várrepresideanta.
Čoahkkimis lei sáhka vejolašvuođa birra suohkaniid gaskasaš doaimmas Skániid joatkkaskuvlla hárrái. Evenášši, Dielddanuori ja Skániid suohkanat leat álggahan prošeavtta skuvlla doaimma joatkimis. Evenášši ja Skániid suohkanat leat maiddái dál čielggadeamen galget go searvat sámegiela hálddašanguvlui, ja jos nu dáhpáhuvvá de šaddá skuvla hui deaŧalažžan dán guovllus.
- Jos báikkálaččat lea sávaldat, de sáhtášii áiggi mielde árvvoštallat ahte Skániid joatkkaskuvla šattašii sámi skuvlan seamma dásis go diet guokte sámi joatkkaskuvlla Guovdageainnus ja Kárášjogas. Sámediggái lea deaŧaleamos guhkes áiggi badjel čoavddus, iige galggašii dárbbašit jahkásaččat rahčat dan beali bušeahttaráđđádallamiin fylkkadikkis, dadjá Laila Susanne Vars.
Son deattuha dasto ahte dákkár árvvoštallama skuvlla oktavuođas ferte dahkat ovttasráđiid vejolaš ođđa skuvlaeaiggádiiguin maŋŋá go Sámediggi lea geargan árvvoštallamis oktavuođa duon guovtti dálá sámi joatkkaskuvlii Kárášjogas ja Guovdageainnus. Dán barggu háliida Sámediggi johtileamos lági mielde čilget.
Positiivva signálat
Fylkkaráđđi Kent Gudmundsen čujuhii čoahkkimis dasa ahte Romssa fylkkasuohkan lea mielas bidjat opmodaga oktan buot visttiiguin suohkanii(dda) - maiddái skuvlaáigumuššan. Son lei maid mielas dasa ahte Romssa oahppit besset vázzit skuvlla Skániid joatkkaskuvllas jus sii dan háliidit. Dan ovddas máksá Romssa fylkkasuohkan skuvlii daid máksomeriid mielde mat gustojit priváhta skuvllaide.
Fylkkaráđđi Trud Berg celkkii ahte Nordlándda fylkkasuohkan ii áiggo hehttet daid guovllu ohppiid, geat dan háliidit, vázzimis Skániid joatkkaskuvlla. Buhtadusa oktavuođas skuvlii háliida fylkkasuohkan bidjat vuođđun dan rádješiehtadusa mii dál lea sohppojuvvon, go máksojuvvo Nordlándda ohppiid ovddas.
Gažaldahkii sáhttá go dán šiehtadusa šiehtadallat Skániid joatkkaskuvlla ektui, de dat ii biehttaluvvon, muhto buhtadus ferte meroštallojuvvot sullasaš prinsihpaid vuođul go dan maid Romssa fylkkasuohkan bidjá vuođđun - máksu priváhta skuvllaid máksomeriid vuođul dahje guosseohppiid máksomeriid vuođul dohkálaš juridihkalaš ja ekonomalaš rámmaid siskkobealde.
Sámedikki várrepresideanta deattuhii skuvlla mearkkašumi márkosámi guovllu sámi ássamii, ja ahte Sámediggi lea positiiva dasa ahte sámivuohta galgá leat nubbi dain guovtti váldoduvdagis boahttevaš skuvladoaimma várás Skániin.
- Mii leat Sámedikkis ilus daid positiivva signálaid geažil mat bohte čoahkkimis ja dainna ahte EDS-suohkanat (Evenášši, Dielddanuorri ja Skánit) dál sáhttet joatkit proseassa ja dalán sáddet departementii ohcama oažžut dohkkehuvvot suohkaniidgaskasaš EDS-joatkkaskuvlla. Mii doaivut ahte departemeanta deattuha daid ákkaid maid Sámediggi ja báikkálaš olbmot leat ovddidan áššis ja addá sierralobi skuvladoaimmaheapmái, loahpaha Laila Susanne Vars.