Lagabuidda 50 jagi lea Carsten Smith barggus bokte leamaš mielde nannemin ovttaskas olbmuid riektesihkarvuođa Norgga servodagas ja son lea maid guovddážis barggus sámiid vuoigatvuođaiguin.
Smith jođihii earret eará Sámi vuoigatvuođalávdegotti barggu, man vuođul ásahuvvui Sámediggi ja ođđa njuolggadus Vuođđolága §:ii 110 sámi kultuvrra suodjaleamis. Son lea maiddái jođihan Riddoguolástuslávdegotti barggu.
- Carsten Smith lea dahkan, ja ain dahká hui deaŧalaš barggu sihke sámiid vuoigatvuođaid ja riektesihkarvuođa ovddidemiin Norggas. Sávan sutnje hui ollu lihku bálkkašumiin. Mun lean ilus Carsten Smith bealis ja mu mielas son ánssáša riektesihkarvuođabálkkašumi, cealká Sámedikki presideanta Egil Olli.
Jurya vuođustusas boahtá ovdan ahte Carsten Smith lea, riektedieđaolmmožin, alimus riekteduopmárin ja servodatberošteaddjin, nannosit váikkuhan Norgga riekteovddideapmái ja servodatságastallamiidda lagabuidda 50 jagi. Vuođđun Riektesihkarvuođabálkkašumi 2010 juohkimii deattuha Jurya erenoamážit su barggu olmmošvuoigatvuođaiguin Norggas.