Riddoguolástuslávdegoddi ja bargu mii lea dahkkojuvvomin guolástanvuoigatvuođaid birra mearas Finnmárkku olggobealde lea Finnmárkkuláhka bargguin joatkin - man oktavuođas Sámediggi ja Ráđđehus leigga ovttaoaivilis ahte maiddái čielggadus sámiid guolástusvuoigatvuođaid birra dahkkojuvvo.
Konsultašuvdnačoahkkimis ovddiduvvojedje sihke Sámedikki ja Guolástusdepartemeantta oainnut, ja vaikko leat dihto prinsihpalaš oaivilerohusat instánssaid gaskka, de lei viidát ovttamielalašvuohta das ahte dán ášši birra ferte viidáset ságastallat.
- Šaddá hui lossat gávdnat čovdosa mas sáhttit leat ovttaoaivilis, muhto mii leat rahpasat čovdosiidda. Dasto lea deaŧalaš čujuhit ahte Sámediggái lea áibbas čielggas ahte prinsihppa guolástusvuoigatvuođa ja guolástushálddašeapmái searvanrievtti birra ferte čuovvoluvvot, dadjá Sámedikki presideanta Egill Olli.
Sámedikki presideanta čujuhii loahpas ahte dán áššis lea sáhka eanet go dušše guolástusvuoigatvuođa birra mearas Finnmárkku olggobealde, dás lea sáhka maiddái mearrasámi kultuvrra suodjaleami birra go dat lea sakka áitojuvvon.
- Sámedikkis ja mus lea geatnegasvuohta fuolahit das ahte mii oažžut dakkár čovdosiid maiguin bisuhuvvo ain ealli mearrasámi kultuvra. Dán birra dat lea sáhka dán áššis.