Nordlándda fylkkamánni lágidan konferánssa mihttomearri lea čuvgehit máttasámegiela oahpahusa erenoamáš hástalusaid ja vejolašvuođaid. Ráđđelahttu Ellinor Marita Jåma lei bovdejuvvon muitalit mo Sámediggi áŋgiruššá máttasámegiela oahpahusain.
- Mii Sámedikkis atnit deaŧalažžan bisuhit ja viidáseappot ovddidit sámegiela deaivvadanbáikkiid, ja ealáskahttit ja nannet sámegiela geavaheami dain guovlluin gos giella lea rašis dilis ja dain guovlluin gos sámegiella ain lea ruovttugiellan, čujuhii Ellinor Marita Jåma.
Son čilgii viidáseappot ahte vaikke vel máttasámegiella lea ovdáneamen, de lea giela gáhttemis ja viidáseappot ovddideamis ollu hástalusat, mat gáibidit oktasaš áŋgiruššama.
- Mis, geat leat dáppe odne, lea buohkain ovddasvástádus, juohkehaččas iežas suorggis, das ahte máttasámegiella duođai galgá šaddat ovdáneaddji giellan. Mis lea oktasaš ovddasvástádus das ahte láhčit gillii vejolašvuođa ovdánit vai maiddái boahttevaš buolvvat galget beassat hállat eatnigielaset, dajai Jåma ealljárvuođain.
Ráđđelahtu Ellinor Marita Jåma olles sáhkavuoru sáhtát lohkat dás.