Várrepresideanta Laila Susanne Vars dadjá ahte okta Sámedikki váldomihttomeriin lea sihkkarastit sámi kultuvrra luondduvuđđosa ja suodjalit sámi kulturmuittuid ja kulturbirrasiid. Sámedikkis leat strategiija dasa ahte bisuhit ja viidáset ovddidit gulahallama ja ovttasbarggu guovddáš, regionála ja báikkálaš eiseválddiiguin, nannen dihtii sámi kultursuodjaleami ja birasgáhttema rámmaeavttuid.
Plánaveahkki
Ođđa plána- ja huksenlága oktavuođas lea Sámedikkis dál gulaskuddamis plánaveahkki sihkkarastit sámi kultuvrra, ealáhusovddideami ja servodateallima luondduvuđđosa. Ođđa plána- ja huksenlágas lea Sámediggi geatnegahttojuvvon oassálastit plánemii, geatnegasvuohta mii maiddái mearkkaša vuoigatvuohta vuosttaldit areálaplánaid. Plánaveahkkeevttohus čielggada Sámedikki vuođu oassálastimii plánabargui.
Bohccot vuddjojit
Nationála fievrridanplána oktavuođas válddiiga sihke sámediggepresideanta Egil Olli ja várrepresideanta Laila Susanne Vars ovdan hástalusaid dan oktavuođas go bohccot vuddjojit Nordlándda ruovdeluotta alde ja eará togaluottaid alde boazoguovlluin. Dakkár doaibmabijut fertejit čađahuvvat, mat sihkkarastet ahte vuddjojuvvon bohccot dalán goddojuvvojit. Bohccuid vuddjomat čuhcet garrasit boazoeaiggádiidda psykihkalaččat ja ekonomalaččat.
Eanadoallu
Eará fáddá mii váldojuvvui ovdan gulahallankonferánssas lei eanadoallo- ja biebmopolitihkka. Sámediggi čujuhii dasa man deaŧalaš dat lea joatkit dálá doarjjaortnegiid ja joatkit dan kanaliserenpolitihka, mii lea čađahuvvon maŋimus 40 jagi. Árktalaš guovlluid eanadoalus leat hástalusat go šaddanáigodat lea oanehaš, muhto seammás ii leat nu stuorra dárbu geavahit šaddosuodjalanávdnasiid árktalaš dálkkádaga geažil. Dát dahká ahte árktalaš borramuša sáhttá vuovdit buhtes biebmun man sáhttá oadjebasat borrat, ja danne sáhttá árktalaš biepmu atnit kvalitehtabuvttan. - Dál lea áigi ahte árktalaš eanadoallu váldojuvvo mielde ráđđehusa davviguovloáŋgiruššamii konkrehta doaibmabijuiguin, dadjá sámediggepresideanta Egil Olli.
Gealbobargosajit
Vuođđoealáhusat leat árbevirolačča leat leamaš sámi servodaga geađgejuolgin. Dáin ealáhusain lea maiddái sámi álbmoga árbediehtu. Go olbmot fárrejit gávpogiidda ja stuorát guovddážiidda, de jávká maid giliin stuorra oassi sámi gelbbolašvuođas. Gealbobargosajit leat deaŧalaččat sámi guovlluin, go galgá viidáseappot ovddidit árbedieđu vuođđun ealáhushutkamii.
Sámi allaskuvllas lea deaŧalaš rolla gealbobargosadjin ja arenan gos árbediehtu seailluhuvvo davviriikkalaš dásis. Danne háliida Sámediggi ahte Sámi allaskuvla oažžu doarvái ruđaid, ja ahte allaskuvla šaddá iehčanas ásahussan sámi alit oahpus ja dutkamis.
Buorre ovttasbargu lea deaŧalaš
Loahpas deattuhii sámediggepresideanta man deaŧalaš dat lea ahte lea buorre ovttasbargu stáhtain ja fylkkagielddaiguin. Go stuorra ođastusat galget ráhkaduvvot, de ferte sámi dimenšuvdna buorebut váldojuvvot mielde álggu rájes jo. Sámi perspektiiva ii galgga leat lassi eará buriid doaibmabijuid bálddas. Stáhtas galgá leat váldoovddasvástádus das ahte láhččojuvvo buorre ovttasbargovuođđu, dadjá sámediggepresideanta Egil Olli.