Indiánaguovllus Xingus oažžuba Sámediggepresideanta Egil Olli ja Stuorradiggepresideanta Dag Terje Andersen áigeguovdilis dieđuid vuovddehuhttima birra, dálkkádaga birra ja álgoálbmogiid rolla birra arvevuvddiid suodjaleami oktavuođas.
-Min áigumuš Xingu-mátkkiin lea geahčadit guoskevaš diliid indiánaguovllus. Dál lea sáhka das ahte Norgga fitnodat áigu hukset čáhcefápmorusttega guvlui mii virggálaččat lea julggaštuvvon indiánaguovlun. Mii eahpidit lea go dákkár fitnodagas miige dahkamušaid dakkár guovllus mii duohtavuođas lea ráfáiduhttojuvvon industriijaávkkástallama vuostá. Midjiide lea viidáseappot deaŧalaš diehtit man muddui SN Power atná deastta guovllu álgoálbmogiin, dadjá sámediggepresideanta Egil Olli.
Deaivvada olmmošvuoigatvuođalávdegottiin
Maŋŋá Xingu-mátkki doallá sámediggepresideanta, ovttas seniorráđđeaddiin Leif A. Dunfjell:in, čoahkkima Brasils Human Rights and Minorities Committee:in, ja stuorradiggepresideanta fas deaivvada riikka Mining and Energy Committee:in.
Čoahkkimis Human Rights and Minorities Committee:in váldá Sámedikki sáttagoddi ovdan Sámedikki ja Stuorradikki gaskasaš konsultašuvdnašiehtadusa, ja Norgga raportta ONii ILO-konvenšuvnna oktavuođas.
Vuolgit oahppat
-Mii vuolgit Lulli-Amerihkkái oahppat guđe hástalusaid eará álgoálbmogat fertejit dustet iežaset árgabeaivvis, muhto mii áigut maid geavahit vuogasvuođa čilget iežamet dili birra ja dan birra maid mii leat juksan, aiddostahttá Egil Olli.