Sámediggeráđi lahttu Marianne Balto lea hui duhtavaš go buot studeanttat vuođđoskuvlaoahpaheaddjioahpus galget oahppat sámiid birra go dat leat álgoálbmot.
Balto lea maiddái movtta go sámi vuođđoskuvlaoahpaheaddjioahpu rámmaplána galgá gustogoahtit buot universitehtaide ja allaskuvllaide. Dál lea vuođđoskuvlaoahpaheaddjioahppu Sámi allaskuvllas, muhto mihkkege ii galggašii hehttet earáid fállamis dákkár oahpu sámegillii.
Vai sámi studeanttat davviriikkain galget sáhttit váldit sámi vuođđoskuvlaoahpaheaddjioahpu Norggas, de lea sis vejolašvuohta luvvejuvvot eret bákkolaš dárogielas.
-Mun lean hui duhtavaš go fágaid njuolggadusain dál lea čielga sámi profiila. Boahtteáiggi oahpaheaddjit galget earret eará oahppat sámi borramušdábiid birra, dadjá Balto.
Ovttasbargu Máhttodepartemeanttain barggus ođđa oahpaheaddjioahpuin lea leamaš buorre, dadjá Balto loahpas.