Nuortasámi musea lea sámi duhátjagibáiki ja galgá rahppojuvvot virggálaččat čakčii. Sámediggeráđi lassejuolludus lea jurddašuvvon veahkkin museii, mii lea vuoitán ollu geavatlaš ja ekonomalaš eastagiid badjel.
Ráđđelahttu Vibeke Larsen deattuha dattetge ahte prinsihpalaččat lea Kulturdepartemeanttas ruđalaš ovddasvástádus das ahte vuođđočájáhus lea válmmas virggálaš rahpamii.
- Vuođđočájáhus lea oassi visttis. Nappo lea ge Kulturdepartemeantta ruđalaš ovddasvástádus ahte dat lea válmmas Nuortasámi musea rahpamii.
Huksenproseassa maŋŋoneapmi lea mielddisbuktá lassi goluid vuođđočájáhusbargui. Ja amaset maŋŋonit ain eanet, de addá sámediggeráđđi 300 000 ruvdnosaš lassejuolludusa museii.
- Dáinna juolludusain sáhttá Nuortasámi museas ain leat earret eará prošeaktavirgi vuođđočájáhusbarggus, loahpaha Larsen.