ON-a Earenoamášdieđiheaddji James Anaya jearaldahkii makkár dárbbut sámiin leat máilmmiviidosaš olmmošvuoigatvuođaid bearráigehččosa ja čađaheami hárrái, vástidii Norgga Sámedikki várrepresideantta ahte lea dárbu sierra davviriikkalaš, iešheanálaš bearráigeahččanorgánii sámiid olmmošvuoigatvuođaid ektui.
-Jus mis livččii sierra vákšunorgána mii bearráigeahčašii earenoamážit movt ON-a Eamiálbmot julggaštusa čađaheami, de geahpedivččii dát olu dan noađi mii Sámedikkiin lea go mii galgat ieš guđet ON-orgánaide juohkit dieđuid ieš guđet servodatsurggiin golmma riika olmmošvuoigatvuođapolitihka birra, dadjá Vars.
Mii leat hui giitevaččat go ON-a Earenoamášdieđiheaddjis ledje čielga ávžžuhusat davviriikkaid ráđđehusaide, ja go muittuhii midjiide ahte davviriikat berrejit leat bálggesčuovgit eamiálbmogiid vuoigatvuođaid ektui, dadjá Láila Susanne Vars.
-Jus ON-a olmmošvuoigatvuođa áigumušat galget ollašuvvot davviriikkain, de dárbbašit mii sierra orgána mii vákšu davviriikkaid sámepolitihka, dadjá Sámedikki várrepresideantta.
Earenoamášdieđiheaddji hástalii davviriikkalaš ráđđehusaid nannet iežaset politihkalaš áŋgiruššama ON-a Eamiálbmotjulggaštusa riikadási čađaheapmái ja čuovvoleapmái.
Sáhkavuorru lea mielddusin eŋgelasgillii.