Konsultašuvnnain Sámedikki ja Máhttodepartemeantta gaskka leat soahpan mandáhta lávdegoddái mii galgá geahčadit sámi dutkama ja alit oahpu.
Várrepresideanta Laila Susanne Vars lea hui duhtavaš konsultašuvdnaproseassain ja loahpalaš mandáhtain.
Vars háliida čujuhit muhtun beliide maiguin lávdegoddi galgá bargat;
- árvvoštallat dálá birrasiid alit dutkamis ja ovddidit evttohusa mat buvttihit dutkandoaimmaid surggiin maid lea stuorra mearkkašupmi sámi servodaga ovddideapmái.
- analyseret rámmaid, rollajuogadeami ja váikkuhanfámu vuoruhemiide sámi dutkamis.
- árvvoštallat Sámi allaskuvlla ovddideami dieđalaš allaskuvlan ja dasto viidáseappot álgoálbmotuniversitehtan.
- evttohit doaibmabijuid maiguin nannet sámegiela dutkangiellan.
Lávdegotti nammaduvvo konsultašuvnnaid maŋŋá Máhttodepartemeantta ja Sámedikki gaskka, ja lávdegoddi galgá geiget raporttas 31.12.2011.
-Vuorddán mielas beassat oaidnit lávdegotti raportta danne go barggus lea stuorra mearkkašupmi sámi servodaga viidáset ovddideapmái, dadjá vel Laila Susanne Vars.