-Dát illudahttá sakka ja lea deaŧalaš olles máttasámi guvlui, rastá riikkarájáid. Elgå skuvla lea ožžon vásihusaid ja máhtolašvuođa mii lea deaŧalaš viidáset bargui giela ovddidemiin, ja mas lea nana ávki earáide geat maid barget issoras ollu sámegiela ovddidemiin, dadjá ráđđelahttu Ellinor Marita Jåma.
Čađahan golmmajagáš prošeavtta
Elgå skuvla lea jagiin 2007-2009 čađahan golmmajagáš giellaprošeavtta. Sámediggi ja Hedemárkku fylkkagielda leat dorjon prošeavtta oktiibuot 1 050 000 ruvnnuin.
Menestus
Giellaprošeakta lea leamaš menestus ja dan oktavuođas lea gártaduvvon stuorra gelbbolašvuohta máttasámegiela oahpahusas skuvllas. Dán gelbbolašvuođas lea stuorra árvu boahtteáiggis oahpponeavvoráhkadeapmái, jorgaleapmái, terminologiijaovddideapmái ja gáiddusoahpaheapmái.
Nannet máttasámegiela
Sámedikkis lea leamaš ulbmilin nannet máttasámegiela ovddideami, maiddái oahpponeavvuid ráhkadeami ja oaidná danne ahte lea dárbu sihkkarastit giellabarggu skuvllas, bisuhit ja nannet dan nu guhká go skuvllas leat sámi oahppit. Dan čállá Sámediggi mearrádusastis.
Nana jáhkku
-Mis lea hui nana jáhkku máttasámegiela ovddideami ektui. Hástalussan leat ekonomalaš ja olmmošlaš resurssat. Danne lea deaŧalaš láhčit nu ahte eanet nuorat vállješedje máttasámegiela, vai mii oččošeimmet eanet olbmuid buvttadit oahpponeavvuid, bargat oahpaheaddjin, jorgaleaddjin, muhto maiddái bargat eará virggiin main sámegielas lea ávki, dadjá ráđđelahttu Ellinor Marita Jåma.