DGT (diehtojuohkin- ja gulahallanteknologiija)-doaibmabargi - jahkái sadjásaš - ref.nr. 10/2742
Sámedikkis lea rabas DGT-doaibmabargi sadjásaš virgi, álgin farggamusat. Bargosadji lea Kárášjogas.
Virggi váldobarggut leat DGT-doaimma ja bajásdoallama siskkobealde, ja dasto geavaheddjiid oahpahus. Virgái sáhttet biddjojuvvot maiddái eará doaimmat Sámedikki doaimma oktavuođas.
Virgái háliidivččiimet olbmo geas lea allaskuvla-/universitehtaoahppu DGT siskkobealde, unnimusat bachelor. Guhkes mávssolaš bargohárjáneapmi sáhttá buhttet vejolaš váilevaš formála oahpu.
Sávvat ahte ohccis lea bargohárjáneapmi dáid siskkobealde; MS Office, Windows, Exchange, SQL Server ja virtualiseren. Dasa lassin deattuhuvvojit buorre fágalaš máhttu, buorit ovttasbargo- ja gulahallandáiddut, maiddái čálalaš ovdanbidjandáidu, dáidu iešheanalit ja ulbmillaččat bargat ja veahkkáivuohta. Dasto deattuhuvvo máhtolašvuođa sámi servodatdiliid birra, ja sámegielas, ja hárjáneami almmolaš hálddašeamis.
Virgi lea biddjon virgekodii 1408 vuosttaškonsuleanta dahje 1434 ráđđeaddi.
Eanet dieđuid virggi birra addet ossodatdirektevra Tommy Somby, vuolitdirektevra Johan Anders Klemetsen dahje vuolitdirektevra Berit Karen Paulsen, tlf. 78 47 40 00.
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai, sii ožžot maiddái sierra vearrogessosa ja lassi mánáidoaju. Dát gustojit dassážiigo Stuorradiggi rievdada dáid ortnegiid.
Sámedikki bargiin lea máškidis bargoáigi. Ohccit geat eai hálddaš sámegiela go biddjojuvvojit virgái, sáhttet ovttasráđiid bargoaddiin geatnegahttojuvvot váldit oahpu sámegielas.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáigi. Bálkkás gessojuvvo 2 % Stáhta penšuvdnakássii.
Ođđa almmolašvuođalága vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.
Ohcanáigemearri: 19.05.10
Virgeohcan sáddejuvvo min digitála ohcanguovddážii:
http://e-skjema.no/sametingett.
Mii bivdit ohcciid almmuhit virggi referánsanummira: 10/2742. Duođaštuvvon skuvla- ja bargoduođaštusaid máŋgosat biddjojuvvojit mielddusin dahje sáddejuvvojit bábirveršuvdnan: Sámediggi - Sametinget, Ávjovárgeaidnu 50, 9730 Kárášjohka/Karasjok