Sámediggeráđi reviderejuvvon bušeahttaevttohusas čuovvoluvvo Norlándda ja Romssa museadoaimma oassečielggadus. Evttohuvvon lasáhus Várdobáiki museai ja bihtánsámi museadoibmii lea 600 000 ru.
- Bihtánsámi guovllus lea guhkes áiggi leamaš dadjat dal čiegus sámi historjá, danne buvttášii báikkálaš sámi historjjá čohkken ja gaskkusteapmi oidnosii ii dušše historjjá muhto maiddái sámi álbmoga mii lea dán guovllus, čilge ráđđelahttu Vibeke Larsen.
Dasto evttohuvvo ahte 40 000 ru várrejuvvo geavaheaddjijovkui mii galgá plánet sámi dáiddamusea.
Háliidit buoridit boarrásiid dili
Boarrásat maid eai leat vajálduvvan jagi 2010 reviderejuvvon bušeahtas ja Sámediggeráđđi evttoha ahte 250 000 ru várrejuvvo johttibálvalusa ásaheapmái addit sámegielat boarrásiidda lohkan- ja čállinveahki.
Sámediggái váldet dađistaga oktavuođa boarráset sámegielat sámit geat eai máhte dárogiela ja geain skuvlavázzima váiluma geažil leat váttisvuođat čađahit beaivválaš doaimmaid dahje ávkkástallat almmolaš bálvalusaiguin mat eanaš leat neahttavuđot.
- Sámediggeráđđi háliida ahte sámi gielddat ja almmolašvuohta buoret vuogi mielde attášedje bálvalusaid sin boarrásiidda, ja danne mii álggahit geahččalanprošeavtta man bokte fállat johtti lohkan- ja čállinveahki boarrásiidda geat eai leat beassan skuvlla vázzit, dadjá Sámedikki várrepresideanta Laila Susanne Vars.
Vars cealká dasto ahte Sámediggeráđi háliida álggos čađahit prošeavtta dain sámi suohkaniin Finnmárkkus gos váttisvuohta lea stuorámus.
- Mii háliidit gulahallat suohkaniiguin, ieš boarrásiiguin ja bálvalusaid addiiguin nugo báŋkkuiguin ja Poasttain. Buohkat fertejit searvat jos galggašeimmet lihkostuvvat ja álkiduhttit boarrásiid árgabeaivvi, dadjá Vars.
Sámediggeráđđi háliida čohkket suohkaniid, boarrásiid, báŋkkuid ja Poastta gulahallančoahkkimii gos sáhttit čielggadit rollaid, ja gávnnahit movt Sámediggi ovttasráđiid dáiguin aktevrraiguin sáhtášii gávdnat buriid čovdosiid sámegielat boarrásiidda.
Sihkkarastit bagadusbálvalusaid
Duodjeinstituhta boahtteáiggi eahpesihkarvuođa geažil leat reviderejuvvon bušeahtas váldojuvvon vuhtii duodjedoaibmabijut, jos DI:s ii šat leat vuođđu viidáset doibmii.
- Sámediggi lea, ja áigu ain leat mielde ovddideamen duoji, ja oaidná ahte bagadusbálvalusat leat deaŧalaččat sihke ealáhuslaččat ja kultuvrralaččat duoji ovddideamis. Dan geažil oaidná ráđđi ahte lea deaŧalaš sihkkarastit, jos Duodjeinstituhtas ii šat leat vuođđu doaibmat viidáseappot, ahte dat ruđat geavahuvvojit duoji bagadusbálvalusaide, dadjá ráđđelahttu Vibeke Larsen loahpas.
Dasa lassin várrejuvvo 50 000 ru kulturdáhpáhusaide dievasčoahkkimiid rahpamiid oktavuođas.