Finnmárkkukommišuvdna muitalii iežaset barggu birra Sámediggái gaskaváhko miessemánu 26.beaivve.
Sámediggepresideantta Egil Olli rabai diehtojuohkinčoahkkima:
Mis lea suohtas go leat ožžon Finnmárkkukomišuvnna guossin Sámediggái muitalit dan barggu birra mainna sii leat álgán bargat.
Mii leat iluin vuordán sin guossái ja mii sávvat komišuvdnii bures boahtima Sámediggái.
Sámedikkis lea beroštupmi Finnmárkkulága mearrádusaid čuovvoleami ektui. Sámediggi oaidná ahte kapihtal 5 finnmárkkulágas mii guoská vuoigatvuođaid kártemii Finnmárkkus, lea erenoamáš deaŧalaš oassi lágas.
Finnmárkkukomišuvnna ásaheapmi lei áibbas dárbbašlaš go Sámediggi galggai sáhttit miehtat finnmárkkuláhkii.
Kártenbargu mii galgá čađahuvvot lea hui viiddis guovllus gos riektedilit leat unnán čilgejuvvon.
Finnmárkkukomišuvdna ferte ieš fuolahit vai dat duohta ja historjjálaš dilit maid lea dárbu čilget čielggaduvvojit dohkálaččat.
Sávahahtti lea oažžut kártema čađahuvvot nu johtilit go lea vejolaš, muhto seammás ferte kárten čađahuvvot dohkálaš vugiin.
Dát mearkkaša dan ahte komišuvdna ferte geavahit dárbbašlaš áiggi kártenbargui. Bohtosat fertejit šaddat riekta.
Dasa lassin galget komišuvnnas leat doarvái resurssat vai sáhttá kártet duohta diliid ja riektediliid "govttolaš áiggi" siskkobealde.
Áibbas guovddážis lea ahte Finnmárkkukomišuvnna ekonomalaš rámmat duođas addet vejolašvuođa čađahit dan barggu maid komišuvdna lea geatnegahttojuvvon dahkat finnmárkkulága mielde.
Dohkálaš bušeahttarámmaid haga gáržžiduvvo finnmárkkulága viđát kapihttala johtui bidjan. Gáržžes rámmat dagahit dan ahte Finnmárkkukomišuvnna bargu šaddá váilevaš guhkesáiggi ektui, ja jođu ja fágalaš vuđolašvuođa ektui.
Dasto fuonida dat luohttámuša finnmárkkuláhkii ja lága oktasaš ja individuála vuoigatvuođaid dohkkeheapmái Finnmárkkus.
Šállošit go árat dán jagi gárttaimet vásihit balddusovdamearkka man oktavuođas finnmárkkukomišuvdnii juolluduvvui birrasii 7,5 miljon ru jahkái 2010. Dát bušeahttarámma ii dávistan dan bargui maid komišuvdna galggai dahkat dan jagis.
Submi šattai maŋŋá 10 miljon ruvdnosažžan jahkái 2010. Sámediggi lea bivdán Justiisa- ja politiijadepartemeanttain čoahkkima ságastallat ja čilget movt sihkkarastit bušeahttarámmaid jagi 2011 rájes Finnmárkkukomišuvnna bargui boahtteáiggis. Mii bivdit einnostanvejolašvuođa dán oktavuođas.
Komišuvdna lea álggahan kártenbarggu fealttas 1 Stierdná/ Sievju ja fealttas 2 Unjárggas. Jagi 2010 áigge álggahuvvo bargu fealttas 3 Sállan.
Komišuvdna lea doallan álbmotčoahkkimiid diibmá fealttaid 1 ja 2 oktavuođas, ja álbmotčoahkkimat fealtta 3 ektui lágiduvvojit dán jagi. Maŋŋá odne lea komišuvnnas diehtojuohkinčoahkkin dáppe Kárášjogas.
Áibbas dárbbašlaš lea lávga oktavuohta álbmogiin ja rabasvuohta komišuvnna barggu ektui go galgá juohkit dieđuid ja bisuhit sin gártaduvvon legitimitehta vejolaš vuoigatvuođaoamasteddjiid gaskkas. Orru ahte Finnmárkkukomišuvdna čađaha dán rolla bures.
Hávski šaddá addit sáni Finnmárkkukomišuvdnii mii áigu lagabuidda muitalit dan barggu ja proseassaid birra maid dat leat álggahan. Doaivvu mielde beassat mii gullat maiddái daid hástalusaid birra maid komišuvdna lea deaividan dál, dahje maid ávaštit sáhttet boahtit boahtteáiggis.
Maŋŋá sáhttet guldaleaddjit geat háliidit váldit sáni ja jearahallat komišuvnnas sin barggu birra.
Attán de sáni Finnmárkkukomišuvdnii, leage buorre.
Loga eambbo Finnmárkkukommišuvnna birra.
Loga eambbo Finnmárkkukommišuvnna birra Justiisa ja politiijadepartementta interneahttasiidduin-
Loga eambbo Finnmárkkulaga birra.
Loga eambbo FeFo birra.