-Ofelašjahki lei vuosttaš jahki goas mun ohppen eanemusat fágalaččat sámi servodaga birra ja movt dat doaibmá stuorraservodaga ektui. Dasa lassin bessen mun oahppat eanet media birra, ohppen doallat sáhkavuoruid ja ohppen man deaŧalaš lea juohkit dieđuid. Olmmoš beassá njulgesta vásihit hui ollu mii lea gelddolaš, muitala Jåma. Son lea dál Sámediggeráđi lahttun ja oaidná man deaŧalaš ofelašprográmma lea.
Ain deaŧalaš bargu
-Ofelašprošeavttas besset nuorat deaivvadit eará nuoraiguin ja máhtolašvuohta gaskkustuvvo nuoraid eavttuid mielde ja man geažil diehtojuohkin šaddá bures áddehahttin ja lea eanet miellagiddevaš, muitala Jåma.
Son oaivvilda ahte ain lea deaŧalaš gaskkustit máhtolašvuođa ja áddejumi sámi diliid birra, danne go oaidnit ohpihii ahte lea hui unnán máhtolašvuohta sámiid ja sámi servodaga birra.
- Ovdamearkka dihtii jerre muhtun Oslo skuvllas ahte borret go sámit Grandiosa, bohkosa Jåma.
Bivnnut maiddái maŋit áiggis
Maŋŋá go mun gergen ofelažžan leat ollu olbmot ja organisašuvnnat váldán muinna oktavuođa ja leat omd. bovden mu doallat sáhkavuoru, searvat sierralágan lávdegottiide jna., muitala Jåma.
Son muitala ahte ofelašprošeavtta bokte beasai son deaivvadit ollu fiinna olbmuiguin ja čatnat buriid oktavuođaid, mii lea leamaš veahkkin munnje ollu maŋit áiggis.
- Sámi nuorat berrešedje ohcat ofelažžan danne go sámi ofelaččat besset oahppat issoras ollu, dadjá loahpas okta dain vuosttamuš ofelaččain, Ellinor Marita Jåma.
Sámi allaskuvla ohcá golbma ođđa sámi ofelačča ja ohcanáigemearri lea geassemánu 4. b. 2010. Ođđa ofelaččat fertejit leat gaskal 18-25 jagi. Ofelaččat fertejit čađahit "Sámi kultuvrra ja servodaga birra" oahpu. Ofelaččat ožžot 170 000 ru stipeandda ja dasa lassin máksá allaskuvla mátke- ja orrungoluid mátkkiid oktavuođas. Ofelaččat fertejit leat ráhkkanan johtit ollu.
Eanet dieđuid addá:
Ráđđeaddi Risten Rávna Länsman, Sámi allaskuvla
Telefovdna: +47 951 39 557, e-poasta: samiskeveivisere@samiskhs.no