Dainna eavttuin ahte ruhtadeapmi ordnašuvvá, guhkiduvvo prošeakta 31.12.12 rádjai. Bargosadji lea Sámedikkis Guovdageainnus.
Sámediggi lea ovttasráđiid Senter for IKT i utdanningen (guovddáš mii heiveha DGT oahpahussii), álggahan prošeavtta man ulbmilin lea ráhkadit sámi oahpponeavvobálvalusa, gos sámi oahpponeavvut čohkkejuvvojit, buvttaduvvojit, juogaduvvojit ja addojuvvojit nuvttá geavahussii neahtas.
Oahpponeavvobálvalusas galgá leat uskkádat gos čalmmustuvvojit dáláš sámi oahpponeavvut, sihke báberhámis ja digitála hámis, ja dat galgá doaibmat reaidun digitála oahpponeavvuid buvttadeapmái, ja dasto doaibmat juohkinarenan gosa oahpaheaddjit sáhttet bidjat oahpahusávdnasiid maid ieža leat ráhkadan ja juogadit daid earáiguin.
Prošeakta bistá 2 ½ jagi, jagi 2012 lohppii, dainna eavttuin ahte ruhtadeapmi ordnašuvvá. Sámediggi lea plánen ahte prošeaktabargin galget leat prošeaktajođiheaddji, Web-redaktevra ja guokte redakšuvdnabargi ja Senter for IKT i utdanningen (guovddáš mii heiveha DGT oahpahussii), beales galget leat prošeaktajođiheaddji ja golbma virggi ovddidanbálvalusa várás.
Web-redaktevras lea bajimuš redakšuvnnalaš ovddasvástádus oahpponeavvouskkádaga sisdoalu ovddideamis, ja sus vurdojuvvo hui nana iešheanalisvuohta. Oassi barggus lea fuolahit ahte bálvalusat uskkádagas čuvvot W3C-rávvagiid, universiealla hábmema gáibádusa (olámuddu) ja eará kvalitehtagáibádusaid earret eará maid Norge.no bidjá, ja dasto lea sus ovddasvástádus kvalitehta dáfus sihkkarastit neahttabáikki sisdoalu ja ráhkadit kvalitehtadagaldumiid. Web-redaktevra galgá maiddái leat guovddážis go guoská bálvalusa sisdoalu ja konseapta ovddideapmái, man oktavuođas lea erenoamáš deaŧalaš fuolahit ahte bálvalusas lea geavaheddjiide ávki ja dat duhtada sin dárbbuid. Virgi siskkáldasat organisašuvnnas doaibmá čanastahkan redakšuvnna ja prošeaktajođiheddjiid gaskka, dasa lassin gullá dasa doallat oktavuođa olggobeale ásahusaiguin ja diehtobuktiiguin ja čuovvolit daid.
Web-redaktevra lea maiddái oassi redakšuvnna operatiivvalaš oasis. Bargui redakšuvnnas gullet almmuheapmi beaivválaččat ja neahttabáikki áigeguovdilastin, geavaheaddjistatistihkka, dieđuid viežžan, teavsttaid/diehtojuohkinávdnasiid hábmen, meattáhusaid divvun jna.
Diehtojuohkinbargu logaldallamiiguin ja searvamiin oahpahusmeassuide ja sullasaččaide gullá virggi bargosuorgái.
Ohccis berre leat:
- alit oahppu ovddemustá masterdássi diehtojuohkinteknologiijas dahje pedagogihkas
- máhtolašvuohta neahttabálvalusaid ovddideamis
- buorre ovddidandáidu dárogillii ja sámegillii sihke njálmmálaččat ja čálalaččat
- gelbbolašvuohta sámi oahppovuogádagaid ektui
- buorre dihtormáhtolašvuohta
- máhtolašvuohta interneahttateknologiijas
- máhtolašvuohta geavahit sierralágan almmuhanreaidduid ja govvagieđahallamiid
- arvilisvuohta ja liiko bargat hirbmat jođánit
Bargohárjáneapmi almmolaš hálddašeamis ja máhtolašvuohta sámi servodatdiliid birra deattuhuvvo. Dasa lassin deattuhit mii buori gelbbolašvuođa, ovttasbargan- ja gulahallanattáldagaid, čálalaš ovdanbuktin dáiddu sámegielas ja dárogielas, dáiddu bargat iešheanalaččat ja ulbmildiđolaččat ja veahkkáivuođa.
Virgi lea biddjon virgekodii 1408 vuosttaškonsuleanta dahje 1434 ráđđeaddi. Ohcci geas lea earenoamáš gelbbolašvuohta sáhttá biddjot virgekodii 1364 seniorráđđeaddi.
Eanet dieđuid virggi birra oažžu go váldá oktavuođa prošeaktajođiheddjiin Inger Eline Eira Buljoin dahje ossodatjođiheddjiin Julie Eirain, tlf. 78 47 40 00.
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai, sii ožžot maiddái sierra vearrogessosa ja lassi mánáidoaju. Dát gustojit dassážiigo Stuorradiggi rievdada dáid ortnegiid.
Sámedikki bargiin lea máškidis bargoáigi. Ohccit geat eai hálddaš sámegiela go biddjojuvvojit virgái, sáhttet ovttasráđiid bargoaddiin geatnegahttojuvvot váldit oahpu sámegielas.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáigi. Bálkkás gessojuvvo 2 % Stáhta penšuvdnakássii.
Ođđa almmolašvuođalága vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.
Ohcanáigemearri: 14.06.10
Ohcan sáddejuvvo min digitála ohcanguovddážii:
http://e-skjema.no/sametinget.
Mii bivdit ohcciid almmuhit virggi referánsanummira: 10/3136. Duođaštuvvon skuvla- ja bargoduođaštusaid máŋgosat biddjojuvvojit mielddusin dahje sáddejuvvojit bábirveršuvdnan: Sámediggi - Sametinget, Ávjovárgeaidnu 50, 9730 Kárášjohka/Karasjok.