Virggi váldobarggut leat ovddidit ja čuovvolit Sámedikki politihka oahpahusa, alit oahpu ja dutkama ektui. Virgái sáhttet maiddái biddjojuvvot eará barggut mat gullet Sámedikki doibmii.
Virgái háliidit dakkár olbmo geas lea alit oahppu allaskuvla/universitehta dásis ovddemustá master-/váldofágadásis pedagogihkas, dahje pedagogalaš oahppu. Bargohárjáneapmi almmolaš hálddašeamis ja máhtolašvuohta sámi servodatdiliid birra deattuhuvvo. Dasa lassin deattuhit mii buori fágalaš gelbbolašvuođa, ovttasbargan- ja gulahallanattáldagaid, čálalaš ovdanbuktin dáiddu, dáiddu bargat iešheanalaččat ja ulbmildiđolaččat ja veahkkáivuođa.
Virgi lea biddjon virgekodii 1408 vuosttaškonsuleanta dahje 1434 ráđđeaddi. Ohcci geas lea earenoamáš gelbbolašvuohta sáhttá biddjot virgekodii 1364 seniorráđđeaddi.
Eanet dieđuid virggi birra addet ossodatdirektevra Julie Eira, vuolitdirektevra Lennart Mikkelsen dahje vuolitdirektevra Inga Margrethe Eira Bjørn, tlf. 78 47 40 00.
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai, sii ožžot maiddái sierra vearrogessosa ja lassi mánáidoaju. Dát gustojit dassážiigo Stuorradiggi rievdada dáid ortnegiid.
Sámedikki bargiin lea máškidis bargoáigi. Ohccit geat eai hálddaš sámegiela go biddjojuvvojit virgái, sáhttet ovttasráđiid bargoaddiin geatnegahttojuvvot váldit oahpu sámegielas.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáigi. Bálkkás gessojuvvo 2 % Stáhta penšuvdnakássii.
Ođđa almmolašvuođalága vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.
Ohcanáigemearri: 14.06.10
Ohcan sáddejuvvo min digitála ohcanguovddážii:
http://e-skjema.no/sametinget.
Mii bivdit ohcciid almmuhit virggi referánsanummira: 10/3147. Duođaštuvvon skuvla- ja bargoduođaštusaid máŋgosat biddjojuvvojit mielddusin dahje sáddejuvvojit bábirveršuvdnan: Sámediggi - Sametinget, Ávjovárgeaidnu 50, 9730 Kárášjohka/Karasjok.