- Lean ilus go Birasgáhttendepartemeantta ja Sámedikki gaskasaš konsultašuvnnaid boađus lea ahte Luondduhálddašandirektoráhta mearraluossabivddu radikála regulerenevttohus ii dohkkehuvvon, dadjá Sámedikki ráđđelahttu Marianne Balto.
Birasgáhttendepartemeantta ja Sámedikki gaskasaš konsultašuvnnaid boađus lea ahte:
• Reguleremat leat gaskaboddasaččat jagi 2010 várás.
• 2009-regulerema bivdoálgináigi Davvi-Romssas, Oarje-Finnmárkkus, Deanuvuonas, Porsáŋgguvuonas ja siskkit Várjjatvuonas ii rievdda. Nappo jotkojuvvo ge geassemánu 1. b. 2009 bivdoálgin buot guovlluin Finnmárkkus, earret guovllus "Kysten av Finnmark" (Finnmárkku rittus).
• Muhtun gáržžideamit leat bivdoáiggi guhkkodagas suoidnemánus/borgemánus, mat čuhcet uhcimusat roahkkefirpmiid geavaheapmái Porsáŋggu- ja Várjjatvuonas.
• Mearra- ja johkabivddu regulereneiseváldi galgá 2011 rájes biddjojuvvot seamma eiseváldedássái. Birasgáhttendepartemeanta ja Sámediggi galget geahččalit soahpat mo juksat dán ulbmila.
• Galgá ráhkaduvvot šiehtadus gaskal Birasgáhttendepartemeantta ja Sámedikki ovttasbargui boahttevaš reguleremiiguin álbmotrievtti vuođul čuovvovaš fáttáiguin: ulbmil, ovttasbargovuogit, máhttoovddideapmi, dás maiddái ovttasbargu gaskal dieđalaš ja vásáhusvuđot máhtu, ja vel konsultašuvdnanjuolggadusat mas maiddái báikkálaš oassálastin galgá čielggaduvvot.
- Ollislaš árvvoštallama vuođul juksojuvvui ovttamielalašvuohta gaskal Birasgáhttendepartemeantta ja Sámedikki reguleremiid oktavuođas earret bivdoálgináigi "Kysten av Finnmark"-guovllus. "Kysten av Finnmark"-guovllu oktavuođas gávnnahuvvui sierramielalašvuohta gaskal Sámedikki ja Birasgáhttendepartemeantta sihke bivdoálgima ja bivdoáiggi guhkkodaga oktavuođas. Reguleremat eai leat nu mo mii millosepmosit háliideimmet, muhto dat duddjo dattetge vuođu jáhkehahtti prosessii reguleremiidda 2011 rájes, dadjá Balto.
Ráđđelahttu Marianne Balto deattuha viidáseappot ahte Sámediggi ii livčče buvttehan nu guhkás go sii dan dahke dán vuoru almmá mearraluossabivdiid ja sin organisašuvnnaid árjjalaš rahčamuša haga.
- Danne sávan ahte mearraluossabivdiid árjjalaš oassálastin ain bistá, ja ahte sin vásáhusat ja máhtu biddjojuvvo vuođđun boahttevaš reguleremiidda, loahpaha Marianne Balto.
Eanet dieđut leat dáppe: http://www.dirnat.no/content.ap?thisId=500040270