Sámedikkis, Finnmárkku fylkkagielddas ja FeFos lea leamaš vuosttaš jahkásaš politihkalaš oktavuohtačoahkkin mii dollojuvvui Kárášjogas. - Dát čoahkkimat leat deaŧalaččat gulahallamiidda min gaskka, dadjá Egil Olli.
Otnáš čoahkkimis almmuhuvvojedje guokte raportta. Nubbi lei NORUT "Finnmarkseiendommen under lupen" nammasaš raporta.
Raporta lea miellagiddevaš. Muhto dat go raporttas boahtá ovdan ahte Sámediggi lea leamaš passiivvalaš, ii leat gal mu mielas riekta. Sámediggi lea oppa áiggi leamaš hirbmat aktiivvalaš, sihke finnmárkkuláhkaproseassas, FeFo ásaheami oktavuođas ja erenoamážit lea leamaš lávga gulahallan stivralahtuiguin, dadjá Olli. - Raporttas váilu maiddái sámi meahcásteami válddahallan, muhto raporta addá muđui hui buori gova FeFo positiivvalaš ovdáneami birra álggu rájes.
Asplan Viak čalmmustii raportta molssaeavttuid hárrái movt geavahit FeFo badjelbáhcaga. -Sámediggi áigu váldit mielde raportta rávvagiid dego árvalussan viidáset bargui ođđa strategalaš plána ráhkadeamis áigodahkii 2011-2014. Sámediggeráđi bealis oaidnit mii ahte bargu strategalaš plánain lea nu deaŧalaš ahte dievasčoahkkin berrešii oažžut ášši meannudeapmái, dadjá presideanta Olli.
Sámedikki barggus ovdal FeFo strategalaš plána mearrádusa dat bohtet ovdan min politihkalaš vuoruheamit. Jahkásaš politihkalaš oktavuohtačoahkkimat leat dán oktavuođas lunddolaš oasit oktavuođa doallamis go galgat lonuhallat oaiviliid Sámedikki, Finnmárkku fylkkagieldda ja FeFo gaskka.
Nubbi politihkalaš oktavuohtačoahkkin dollojuvvo dán jagi loahpas.