Prošeakta, mii lea oassi árbedieđuid, máttasámi kultuvrra ja giela suodjaleamis, lea ovttasbargo- prošeakta Saemien Siljte ja Sámi allaskuvlla gaskka. Máttasámi guovllus leat guhká váillahan dán kurssa ja searvan duođašta čielgasit ahte lea stuorra dárbu dán lágan ohppui.
- Mun lean issoras movtta go Saemien sijte ja Sámi allaskuvla leat lágidan dán kurssa. Ja mu illudahttá dat go nu ollugat leat searvan kursii. Mun in sáhte dadjat eará go rámiidit dán oahpu buollisearaid, go almmá nana buollisearaid haga geain lea sávaldat nannet ja ovddidit duoji ja máttasámegiela, ii livččii dát kursa álggahuvvon, cealká Jåma.
Sámediggi lea dán válgaáigodagas erenoamážit deattuhan máttasámegiela, ja Sámedikki mielas lea čielggas ahte go giela galgá nannet ja suodjalit, de ferte čađahit doaibmabijuid. Ráđđelahttu Ellinor Marita Jåma deattuha ahte juste danne lea buorre go dákkár oahppu go Duodji ja máttasámegiella /giellageavaheapmi duojis lea álggahuvvon.
- Dát čájeha ahte mii buohkat háliidit ovdánit seamma guvlui ja ahte máttasámi álbmot háliida suodjalit iežaset giela ja kultuvrra.
Sámediggeráđi lahttu Jåma rámiidii kurssa vuolggaheddjiid ja studeanttaid, ja muittuhii man deaŧalaš lea suodjalit deaŧalaš identitehtamearkkaid sámi servodagas.
- Mun lean sihke rámis ja hirpmástuvvan maid studeanttat leat buvttadan, sihke go jurddašit duoji ja giellamáhtolašvuođa. Dán prošeavttas lea Saemien Sijte ja Sámi allaskuvla nagodan buohtalastit máttasámegiela oahpahusa ja duodji hui erenoamáš vuogi mielde. Goappašiin lea stuorra árvu, ja dat leaba guovdileamos identitehtamearkkat sámi servodagas. Juste sámi giela ja kultuvrra ovddideapmi ja nannen bisuhage ealli sámi servodagaid.