Iešsorbmen lea stuorra váttisvuohta sámi servodagas. Danne háliida Sámediggeráđđi vuoruhit dan barggu ahte eastadit iešsorbmemiid sápmelaččaid gaskkas.
-Ollugat leat váldán oktavuođa muinna ja bivdán mu loktet dán ášši, dadjá ráđđelahttu Ellinor Marita Jåma. Mun lea maiddái ieš vásihan iešsorbmema iežan lagašbirrasis, dadjá Jåma.
Davviriikkalaš ovttasbargu
Sámediggeráđđi oaivvilda ahte dát lea dakkár suorgi, mas sáhttá leat guoskevaš ohcat ovttasbarggu Sámedikkiiguin Rouŧa ja Suoma bealde. Dainna lágiin sáhttit gávnnahit guđe doaibmabijut sáhttet leat ávkkálepmosat sámi álbmogii.
-Guhkit áiggi vuollái sáhttit ráhkadit oktasaš strategiija dakkár doaibmabijuiguin, mat sáhttet veahkehit eastadit iešsorbmema sápmelaččaid gaskkas, dadjá ráđđelahttu Ellinor Marita Jåma. Deaŧalaš lea oahppat guhtet guimmiineamet ja geavahit guhtet guimmiideamet vásáhusaid iešsorbmema birra, dadjá Jåma.
Dárbu dutkamii
-Mis lea oktavuohta Sámi našuvnnalaš gealboguovddáža psyhkalaš dearvvašvuođasuodjalusain dán áššis. Sámediggeráđđi áigu ovttas fágaásahusaiguin digaštallat dárbbu dutkamii dán suorggis, ja mo mii buoremusat sáhttit leat mielde eastadeamen iešsorbmema, dadjá ráđđelahttu Ellinor Marita Jåma.
Loga eambbo Sámi našuvnnalaš gealboguovddáš - psykalaš dearvvasvuođasuddjen birra.