- Mu illudahttá go oainnán ahte sámi mánát ja nuorat háliidit váldit eksámena sámegielas váldogiellan, ja juste danne mii eat sáhtege dohkkehit ahte skuvlavuogádaga meaddin čuohcá dáid ohppiide, dadjá Sámediggeráđi lahttu Ellinor Marita Jåma.
Ellinor Marita Jåma deattuha dasto ahte skuvllain lea lága mielde geatnegasvuohta čuovvut daid oahppoplánaid maid Oahpahusdirektoráhta lea bidjan ja ahte erenoamáš deaŧalaš lea fuolahit ahte sámi mánát ja nuorat ožžot vejolašvuođa oažžut oahpahusa eatnigielas ja eatnigillii.
- Mun mielas lea njulgestaga ahkit gullat muitalusaid dan birra go skuvlavuogádat beahttá mánáid ja nuoraid. Mii Sámedikkis eat sáhte buktit cealkámušaid ovttaskas áššiid birra, muhto munnje lea deaŧalaš ahte oahpahus sámegielas doaibmá nugo galgá, dadjá Sámediggeráđi lahttu Jåma.
Dárogiella ohppiide geain lea sámegiella vuosttašgiellan - oahppoplána mielde galgá fága "sámegiella vuosttašgiellan" ovttas dárogielfágain bidjat vuođu ohppiid guovttegielatvuođa ovddideapmái, ja váikkuhit dan ahte ovttaskas oahppit ožžot máhtolašvuođa, movttiidahttojuvvojit ja ožžot oadjebasvuođa bisuhit, nannet ja ovddidit giela sihke njálmmálaččat ja čálalaččat.
- Šállošan sakka go sámi mánáin lea várra massit beroštumi dan geažil go skuvlavuogádat moive. Mii berrešeimmet dahkat buot maid sáhttit vai dáin ohppiin livččii buorre skuvladilli, eaige ollu vuostegieđageavvamat. Dat go mánát háliidit sámegiela vuosttaš giellan lea deaŧalaš oassi sámegiela nannemis. Go juste dát oahppit han dat galgetge guoddit giela viidáseappot boahtteáiggis, čujuha ráđđelahttu Ellinor Marita Jåma.
Fága "sámegiella váldogiellan" ulbmilin lea gozihit sámi kultuvrra guovddáš árvvuid. Fága sáhttá maiddái leat čujuhussan movt sámi árvvut sáhttet heivehuvvot ja viidáset ovddiduvvot ođđa diliide ja áigái mii dađistaga rievdá. Máhtolašvuohta eará álgoálbmogiid ja kultuvrraid birra sáhttá váikkuhit ahte eanet áddet ja gudnejahttit earáid, muhto maiddái iežamet kultuvrra áddejumi buorideapmái.
-Jos mii áigut bisuhit sámegiela ealli giellan ja sámi kultuvrra ealli kultuvran, de eat sáhte dohkkehit ahte skuvlavuogádat beahttá sámi ohppiid, Ellinor Marita Jåma loahpas.