-Sámediggeráđđi lea ilus go dál leat vuolláičállán šiehtadusa ČálliidLágádusain mii sihkkarastá matematihkkagirjjiid buot golmma sámegillii vuođđoskuvlii. Dát lea dehálaš oassi sámediggeráđi barggus buoridit sámi mánáid ja nuoraid oahpponeavvodili, dadjá Sámedikki várrepresideanta Láilá Susanne Vars.
-Matematihkka lea dehálaš fága mii dál vuoruhuvvo. Danne lea lunddolaš ahte sámegillii maid leat matematihkkagirjjit. Go oažžu matematihkkaoahpahusa iežas gillii de álkibut ipmirda fága ja dat maiddái movttiidahttá. Dasa lassin nannejuvvo ja ovdánahttojuvvo sámegiella. Buot oahpahus mii jođihuvvo sámegillii nanne ja ovdánahttá sámegiela, dadjá várrepresideanta Láilá Susanne Vars.
Julevsámegillii jorgaluvvojit dál matematihkkagirjjit vuosttaš geardde. Ovdal leat buktosat jorgaluvvon davvisámegillii ja vuolimus cehkiide mánáidskuvllas lullisámegillii.