Dákko sáhtát lohkat reguleremiid birra.
http://www.regjeringen.no/nb/dep/fkd/pressesenter/pressemeldinger/2010/Reguleringer-for-fangst-av-kongekrabbe-i-20102011.html?id=608354#)
Porsáŋgguvuotna gullá dál bivdoearreregulerejuvvon guvlui ja regulerejuvvon guovllu davimus rádji lea sirdojuvvon guhkkelii eret nannámis, nie movt Sámediggi evttohii.
Maŋŋá go Mearradutkaninstituhtta lei evttohan ahte ii álggage gonagasreabbá bivdu, de ovddidii Sámediggi bivdoearregáibádusa 1185 tonna varris reappáide. Departemeanta lea dál evttohan 900 tonna bivdoeari varris reappáide ja 50 tonna njiŋŋelas reappáide.
Go guoská njiŋŋelas reappáide de dávista dat Sámedikki evttohussii, muhto varris reabbábivdu lea unniduvvon 24 % Sámedikki evttohusa ektui. Vaikko vel bivdoearit unniduvvojedjege, de leat dat dan muttos ahte daiguin sáhttá eallit ja dat addá vuođu viehka ollu doaimmaide guovllus.
Go guoská Sámedikki sávaldahkii bidjat stuorát ráŋggáštusa bivdorihkkosiidda, de lea dat viehka guhkás ollašuhttojuvvon go juo dán jagi reguleremiid bokte evttohuvvojit dakkár njuolggadusat maid lea álkit bearráigeahččat go ovdal.
-Gonagasreabbábivdu lea deaŧalaš ollu guolásteddjiide ja báikegottiide, ja mii leat danne duhtavaččat bivdoeriin mii lea mearriduvvon, dadjá Sámedikki presideanta Egil Olli.