Sámediggeráđi evttohusa duogážin lea ođđa plána- ja huksenlága atnui váldin suoidnemánu 1. b. 2009. Ođđa plána- ja huksenlága okta doaibma lea sihkkarastit sámi kultuvrra, ealáhusovddideami ja servodateallima luondduvuđđosa, ja leat veahkkin riikkaidgaskasaš konvenšuvnnaid ja šiehtadusaid čađaheamis lága doaibmaviidodaga siskkobealde. Sámediggái lea addojuvvon váldi ovddidit vuosteákkaid gieldaplána areálaoassái ja regulerenplánaide áššiin main lea stuorra mearkkašupmi sámi kultuvrii dahje ealáhusovddideapmái.
Evttohus plánaveahki hárrái lea leamaš viiddis gulaskuddamis. 25 gulaskuddancealkámuša leat buktojuvvon maid birra lea ságastallojuvvon, ja mat leat vuhtii váldojuvvon loahpalaš evttohusas. Plánaveahki ulbmilin lea addit čorgadis ja čoahkis geahčastaga das mat galget vuhtii váldojuvvot sámi kultuvrra oktavuođas, ja makkár čuvvosat leat Norgga ja riikkaidgaskasaš rievttis.
Sámedikki dievasčoahkkin dohkkehii plánaveahki čoahkkimisttis 23. vahkus.