Deanu kulturskuvla pláne buvttadit sámi mánáidteáhteriid main ođđa sámi dramatihkka lea vuođđun. Prošeakta vurdo bistit 3 jagi.
Ulbmil prošeavttain lea ahte teáhterbuvttadeapmi galgá váikkuhit dasa ahte šaddá viiddiduvvon oahpahusfálaldat mánáide ja nuoraide drámá, musihka ja dánssa siskkobealde. Áigumuš lea ovdánahttit teáhtera mii šaddá bistevaš sámi mánáidteáhterinstitušuvdnan.
-Mii sávvat ahte mánáidteáhter- prošeakta boktá eanet beroštumi drámái, musihkkii ja dánsii. Lea dehálaš ahte gávdnojit dákkár arenat sámi mánáide, lohká Sámediggeráđđi Marianne Balto.
Ovdánahttit taleanttaid
Deanu kulturskuvla háliida leat báikkálaš resursaguovddáš eaktodáhtolaš kultureallimii, ja regionálalaš resursaguovddáš olles Sápmái, mas lea erenoamášgelbbolašvuohta sámi mánáidteáhteris, mii háhká vejolašvuođa addit sámi mánáide vejolašvuođa ovdánahttit iežaset taleantta lávdedáidaga ja drámá doaimmaid siskkobealde. Kulturskuvla bargá dan nala ahte čalmmustahttit sámegiela geavaheami bokte lávddi nalde, ja sis leat sullii 40 oasseváldi geat leat oassálastán sámegielat drámáoahpahusas jagi 2004 rájis. Kulturskuvla lea buvttadan máŋga teáhterbihtá maŋimus jagiid.
Ovddasta Sámi Duiskkas
Kulturskuvla galgá bihtáin "Sunná šiella", maid Inger Margrethe Olsen lea čállán, ovddastit Norgga riikkaidgaskasaš mánáidteáhterfestiválas mii lágiduvvo 11 gearddi, Lingenis Duiskkas. Bihttá lea ovttasbargu kulturinstitušuvnnaiguin ja Beaivváš Sámi teáhteriin.
- Deanu kulturskuvla váikkuha dasa ahte oallugat servet doaimmaide, sihke mánát, váhnemat ja olles Deatnu. Dássi čájálmasaiguin lea dál juo allat, lohká Balto.