Lea vuođđuduvvon bargojoavku mii galgá bargat 2017 rádjái, gos 100- jagi ávvudeapmi galgá dollojuvvot, dan rájis go sámiid vuosttaš davviriikkalaš kongreassa dollojuvvui Troandimis jagi 1917. Prošeavttain Sámi Báiki sávvet álggaheaddjit beassat bargat sámi čálgo- ja oahppofálaldagaiguin, sámi arenaiguin gávpogis ja sámi historjjáin mii lea čadnojuvvon gávpogii ja guvlui.
- Odne ii gávdno oktage fásta deaivvadanbáiki sápmelaččaide Troandimis, ja min mielas Sámediggeráđis lea Sámi Báiki buorre prošeakta. Lea dehálaš midjiide ahte maiddái sápmelaččain stuorit gávpogiin leat arenat gos sáhttet deaivvadit, ja mii sávvat ahte juolludeapmi áiggi mielde sáhttá leat searvvis ovddideame barggu ásahit fásta deaivvadanbáikki sápmelaččaide Troandimis, lohká Sámediggeráđđi Ellinor Marita Jåma.
Bargolávdegottis mii lea vuođđuduvvon, leat áirasat Lulli- Trøndelaga ja Hedemárkku sámi servviin, Åarjel Saemiej Gielh, Troandin suohkanis ja Lulli- Trøndelaga fylkkasuohkanis.
Eará áŋgiruššamat lullisámi guovllus
Sámediggeráđđi lea maid dohkkehan reviderejuvvon ovttasbargošiehtadusa fylkkasuohkaniiguin lullisámi guovllus, ja maid juolludan 50 duhát ruvnno Sijti Jarnge čađahit seminára oahpahusa ja dutkama birra sámi birrasiin Helgelánddas ja Västerbottenis.