- Dat go evttoha bákkolaš sámegieloahpahusa vuođđoskuvllas lea miellagiddevaš jurdda ja mun doaivvun ahte dát buvttášii buori ságastallama báikkálaččat dan birra movt sáhttá nannet sámegieloahpahusa vuođđoskuvllas Divttasvuona suohkanis. Guovtti giela máhttin lea riggodahkan mánáide, ja addá mánáide ollu vejolašvuođaid sihke ámmáha dáfus ja kultuvrralaččat rávisolbmoagis, dadjá Sámedikki várrepresideanta Laila Susanne Vars.
Divttasvuona suohkana sátnejođiheaddji háliidivččii ollu áŋgiruššamiid, maiddái rávisolbmuid oahpahusa ektui sámegielas ja sámegillii. Dát dávista Sámediggeráđi áŋgiruššamiidda rávisolbmuid oahpahusain.
Sámediggi ja Sámi allaskuvla leat 2009:s dahkan šiehtadusa viđa jagáš sámi rávisolbmuidoahpahusprográmma ovddideamis ja čađaheamis buot sámi giellaguovlluin. Gávdnojit maiddái sierra oahppolávdegottit main erenoamáš ovddasvástádussan lea čađahit rávisolbmuidoahpahusa sámiid várás ja sin gaskkas.
- Mii diehtit ahte ollu rávisolbmuin Divttasvuona suohkanis lea leamaš sámegiella ruovttugiellan, muhto eai hála gal sámegiela beaivválaččat. Dát lea deaŧalaš ja rivttes áŋgiruššan rávisolbmuidoahpahusa ektui maid Divttasvuona politihkalaš jođiheaddjit áiggošedje čađahit. Erenoamáš deaŧalaš lea nannet rávisolbmuidoahpahusa dán guovllus, vai oččošeimmet eanet julevsámegiela geavaheddjiid boahtteáiggis, dadjá Laila Susanne Vars.