Máhttoloktema atnui váldima oktavuođas deattuhuvvui ahte váilot sámi oahpponeavvut. Danne biddjojuvvui cuoŋománus 2009 bargojoavku.
Mandáhtan lea leamaš:
•- Árvvoštallat dáláš sámi oahpponeavvuid ovddideami ja buvttadeami.
•- Árvvoštallama vuođul evttohit rievdadusaid beavttálmahttin dihte oahpponeavvuid ovddideami Mánáidgárderámmaplána mielde ja Máhttoloktema Sámi mielde.
•- Árvvoštallat makkár ekonomalaš váikkuhusat evttohusain šattašedje.
Sámedikki várrepresideanta Laila Susanne Vars dadjá ahte doaibmabijut maid bargojoavku evttoha leat miellagiddevaččat ja ahte Sámediggeráđđi lea juo álggahan máŋga dain evttohusain maid bargojoavku bidjá ovdan áigeguovdilis doaibmabidjun. Earret eará lea Sámediggi álggahan golmma jagáš ovdaprošeavtta sámi oahpponeavvoportála ásaheapmái.
Dá leat bargojoavkku evttohusat:
•- Sámi oahpponeavvoportála ásaheapmi.
•- Mátta-sámi resursaguovddáža ásaheapmi oahpponeavvuid ovddideami várás.
•- Gelbbolašvuođahuksejeaddji doaibmabijut maid bokte rekrutteret girječálliid ja ovddideddjiid, erenoamážit go guoská julev- ja máttasámegielaide.
•- Rekrutterendoaibmabijut mátta- ja julevsámi oahpponeavvočálliid ja -ovddideddjiid várás.
•- Vuovdalan- ja diehtojuohkinbarggu nannen.
•- Lávgadeappot čuovvoleapmi ja stuorát gáibádusat raporteremii ja ovdáneapmái.
•- Daid prošeavttaid loahpaheapmi mat leat álggahuvvon ovdal go Máhttolokten bođii ja mat eai leat gárvvistuvvon.
•- Heaittihit nuvttá oahppaneavvoortnega. Skuvlaeaiggádis dat lea ovddasvástádus das ahte ohppiin leat dárbbašlaš oahpponeavvut. Bargojoavku oaivvilda ahte ruđat mat geavahuvvojit nuvttá oahpponeavvoortnegii, berrešedje baicce geavahuvvot ođđa oahpponeavvuid ovddideapmái.
•- Bargojoavku evttoha ahte luvvejuvvon ruđat beavttálmahttima čuovusin manašedje ođđa oahpponeavvuid ovddideapmái ja buvttadeapmái vai johtileappot sáhtášii almmuhit eanet oahpponeavvuid.
•- Sámedikki lahtut bargojoavkkus oaivvildit ahte juolludusaid lasiheapmi pedagogalaš ávdnasiid ja oahpponeavvuid ovddideapmái beavttálmahtášii buvttadeami.
Várrepresideanta Laila Susanne Vars dadjá ahte Sámediggeráđđi lea juo álgán árvvoštallat nuvttá oahpponeavvoortnega ođđa strategalaš oahpponeavvoovddidanplána oktavuođas áigodahkii maŋŋá 2012. Árvvoštallat earret eará man ollu ortnet čuozašii oahpponeavvuid ođđabuvttadeapmái, ja makkár eará molssaeavttut sáhtášedje leat heivvolaččat.
Sámediggeráđđi sávvá ahte šattašii viiddis ságastallan raportta birra.