EMRIP lea ON mekanisma álgoálbmotvuoigatvuođaid váste ja ásahuvvui 2008:s ON Olmmošvuoigatvuođaráđi bokte. EMRIP ásaheami duogáš lea ON Álgoálbmotjulggaštus mii dohkkehuvvui čakčamánu 13. b. 2007. Áššedovdijoavkkus leat vihtta miellahtu ja dat galgá rávvet Olmmošvuoigatvuođaráđi áššiin mat gusket álgoálbmogiidda.
Loga eambbo ON Álgoálbmotjulggaštusa birra dás.
Sámi álgoálbmotáššedovdi Norggas, John Bernhard Henriksen, válljejuvvui mekanismma vuosttaš jođiheaddjin, ja dan maŋŋel lei Jenny Lasimbang Malaysias 2009:s. Dál lea José Carlos Morales Costa Ricas eret jođiheaddji.
EMRIP raportere Olmmošvuoigatvuođaráđđái
Dán jagáš sešuvnna duogáš lea ahte EMRIP lea ožžon ON olmmošvuoigatvuođaráđis mandáhttan ovddidit dutkosa álgoálbmogiid vuoigatvuođaid birra searvat mearridanproseassaide. EMRIP galgá ovdanbuktit gaskaboddosaš raportta Olmmošvuoigatvuođaráđi 15. sešuvdnii dán jagi, ja geiget loahpalaš raportta Ráđi 18. sešuvdnii 2011:s.
EMRIP lea ovdalaš sin 3. sešuvnna ovdanbuktán evttohusa iežaset gaskaboddosaš raportii mii vuolggaha ovtta dain digaštallanvuođuin mii guoská fáddái álgoálbmogiid vuoigatvuođat searvat mearridanproseassaide.
Loga eambbo gaskaboddosat raportaevttohusa birra dás.
Álgoálbmotvuoigatvuođaid áššedovdimekanisma lea dáid beivviid čoahkkanan digaštallat gaskaboddosaš raportta evttohusa. Das oassálastet álgoálbmogat ja stáhta delegašuvnnat geain lea vejolašvuohta buktit cealkámušaid maid EMRIP ávžžuhuvvo váldit vuhtii ovdal go mearridit sisdoalu iežaset gaskaboddasaš raportii.
EMRIP mearrida iežas gaskaboddosaš raportta bearjadaga suoidnemánu 16. b. Gaskaboddosaš raporta ovddiduvvo Olmmošvuoigatvuođaráđđái čakčamánu dán jagi.
Loga eambbo EMRIP birra dás.
Álgoálbmogat bukte eanemus cealkámušaid
3. fáddá loahpaheamis, vuoigatvuođat searvat mearridanproseassaide, giitte EMRIP lahtut buot cealkámušaid ovddas. Áššedovdilahttu Jon Bernhard Henriksen lei giitevaš earret eará daid cealkámušaid ovddas mat ávžžuhedje EMRIP sin loahpalaš raporttas eanet fokuseret doaimmaid lágaid vuođul mat sihkkarastet vuoigatvuođaid searvat mearridanproseassaide. Son čujuhii Álgoálbmotjulggaštussii artihkal 38:
"Stáhta galgá, ovttasráđiid ja ovttasbargguin guoskevaš álgoálbmogiin, doaimmahit ulbmillaš doaibmabijuid, earret eará lágaid vuođul, olahan dihte dán julggaštusa ulbmila"
EMRIP jođiheaddji José Carlos Morales čujuhii loahpalaččat ahte sárdnelisttus ledje eanas álgoálbmogat ja ahte unnán nationála stáhta geavahedje vejolašvuođaset buktit cealkámušaid.
Norga, ovddastuvvon Ođasmahttin-, hálddahus- ja girkodepartemeantta bokte, ovddidii iežas cealkámuša suoidnemánu 12.b. Dat cealkámuš almmuhuvvo min neahttasiidduin maŋŋel. Sámediggi ovddidii iežas cealkámušaid suoidnemánu 13. b. ja dan gávnnat dokumeanttas dás vuollelis.