Ráđđi ii dohkket ahte láhkalávdegoddi guolleresursaáššiin bidjá vuođđun áibbas nuppelágan prinsihpaid go eanavuoigatvuođaáššiin.
- Lean hui ilus go lávdegoddelahttu, Berit Ranveig Nilssen, lea vuosttaldan dán evttohusa. Jus eaiggáduššanriekti mearraguliide priváhtarievttálaš áddejumi mielde sirdojuvvo stáhtii, de dat lea vearredahku vuotna- ja riddoguovlluid ássiid vuostá. 150 jagi áigi mearridii stáhta ahte ii oktage eaiggáduššan Finnmárkku ja danne dat lei stáhta opmodat. Finnmárkkuláhka čájeha ahte dát lei fasttes vearredahku sápmelaččaid ja báikkálaš álbmoga vuostá. Seammá guoská maiddái guolleresurssaide, dadjá Sámediggeráđi lahttu, Svein Peter Pedersen.
Dál ii eaiggáduša oktage meara luođuresurssaid vaikke vel lágat ja láhkaásahusat muddejit ovdamearkka dihtii guollebivddu. Eará guolástannašuvnnain eaiggáduššá álbmot guolleresurssaid, nu ahte guolleresurssat gullet searvevuhtii. Sámediggeráđđi deattasta ahte ávkkástallan mearraresurssaiguin mearkkaša hui ollu ássamii ja barggolašvuhtii miehtá mearragátti ja lea dán rádjai leamaš buohkaidrieki.
- Lea hui šlundudahtti go Mearraresursaláhkalávdegotti eanetlohku ii oro leamen árvvoštallan man mávssolaš guolásteapmi lea min ássanvuohkái ja min riddokultuvrii. Mun vuorddán ahte ráđđehus ja stáhtaráđđi Svein Ludvigsen, gii ieš boahtá mearraservodagas, eai doarjjo lávdegotti evttohusa.
Guolleresurssat berre leat min oktasašopmodat go dat lea erenoamáš deaŧalaš oassi riddokultuvrra ja sámi kultuvrra ávnnaslaš vuđđosis. Dákkár boasttuvuođaid lea ovdal geahččalan dahkat Finnmárkku eana- ja čáhcevuoigatvuođaáššis, iige dan berre dahkat ođđasis, váruha Pedersen.