Vuođđudeaddjin leat Davviálbmogiid guovddáš, Riddu Riđđu ja Namgar Lkhasaranova Moskovas.
Formála namma (dárogillii) lea Kulturformidlingssenter for nordlige urfolk.
Galgá ovddidit ovttasbarggu
Guovddáš galgá ovdánahttit dáiddalaš ja kultuvrralaš ovttasbarggu Ruošša ja Norgga/davviriikkaid gaskka, mas erenoamážit guovddážis leat álgoálbmogat ja minoritehtat.
-Buorre lea go álgoálbmogat barget ovttas danne go mis lea ollu maid oahppat guđet guoimmisteamet. Guovddáš galgá vel ain eanet nannet oktavuođaid álgoálbmogiid gaskka min guovlluin, dadjá ráđđelahttu Vibeke Larsen.
Guovddáš lea riikkaidgaskasaš kulturbarggu viidáset gaskkusteapmi maid Riddu Riđđu festivála ja Davviálbmogiid guovddáš leat čađahan máŋggaid jagiid, davviguovlluid ja Ruošša ektui ovddemusat. Guovddáš galgá maiddái čađahit sierra dáidda- ja kulturprošeavttaid Ruoššas main guovddážis leat davviálbmogat.
Sávvat lihku ásahemiin
Sámediggeráđi lahttu Vibeke Larsen ja Sámediggi sávvet lihku bargguin álgoálbmogiid dáidaga ja kultuvrra loktema oktavuođas rastá riikkarájáid árktisis, ja dainna lágiin váikkuhit dan ahte álgoálbmogat oččošedje stuorát saji davviguovlluin.
Loga eambba Davvi álbmogiid guovddáža birra