Prošeavtta ulbmilin lea čohkket sámi fágabirrasiid ja sámi resursaolbmuid hábmet sisdoalu sámi iešmearrideapmái, ja movt iešmearrideami sáhtášii čađahit geavatlaš politihkas Norggas.
Prošeavttas deattuhuvvojit erenoamážit čuovvovaš servodat- ja áššesuorggit; oahpahus, dutkan, kultuvra, mediat, árbevirolaš ealáhusat, eatnamat ja resurssat, dearvvašvuođa- ja sosiálasuorgi ja Sámedikki politihkalaš váldi.
-Doahpaga oktavuođas sámi iešmearrideapmi lea sáhka politihka birra ja danne lea deaŧalaš bidjat dasa sisdoalu, vai ságastallamis šattašii gávnnálaš, dadjá Sámedikki presideanta Egil Olli.
Olli čujuha ahte dát lea Ođasmahttin-, hálddahus- ja girkodepartemeantta ja Sámedikki gaskasaš ovttasbargoprošeakta. Dán golmma jagáš prošeavtta ruhtadeaba oasálaččat ovtta mađe goabbáge. Boađus galgá leat vuođđun viidáset ságastallamii fáttá birra man oktavuođas maiddái álbmot galgá beassat searvat ságastallamiidda sámi iešmearrideami birra.
Prošeavttas gieđahallojuvvojit guovddáš politihkalaš áššit maiguin Sámediggi bargá beaivválaččat. Das galget čuvgejuvvot áššečuolmmat ja vejolaš čovdosat dan ektui movt sámi iešmearrideami sáhtášii čađahit geavatlaš politihkas, go dat lea deaŧalaš vuođđun Sámedikki politihka hábmemii. Sierra servodatsurggiid ektui nugo oahpahus, dutkan, ekonomiija, riekteáššit, kultuvra ja sámi ealáhusat.
Ovdal juolludan ruđaid
Sámediggi lea ovdal juolludan 550 000 ru prošektii, mii maiddái lea ruhtaduvvon ovddeš Bargo- ja searvadahttindepartemeantta ruđaiguin. Gáldu lea čađahan golbma seminára oahpahusa, dutkama ja kultuvrra oktavuođas. Dasa lassin lea Gáldu ON álgoálbmogiid bissovaš foruma čoahkkima oktavuođas New York:as čađahan sierra seminára prošeavtta birra.
Erenoamášráđđeaddi jođiha prošeavtta
Erenoamášráđđeaddis John B. Henriksen galgá leat fágalaš ovddasvástádus prošeaktaoktiiordnejeaddjin nugo plánet, oktiiordnet ja čađahit prošeavtta. Son lea leamaš jođiheaddji ja dieđiheaddji ON álgoálbmotvuoigatvuođaid áššedovdimekanismmas Olmmošvuoigatvuođaráđi vuolde.
Loga eanet Gáldu birra: www.galdu.no