Prošeakta "Cuvket rájáid" galgá lágiduvvot sámi nuoraid organisašuvnna Noereh! vuosttaš riikačoahkkima oktavuođas golggotmánu 7.-10. b. Hemnesas Nordlánddas dán jagi.
Duddjo rahpaset servodaga
Prošeavtta ulbmil lea njeaidit muhtun rájáid sámi nuoraid guottuin. Dan čállá Noereh! ohcamisttis. Noereh! háliida čájehit ahte juohkehaš lea bures boahtin sámi servodahkii, leš dal uhcci vai stuoris, dábálaš vai ii, ii galgga mearkkašit maidege vállježat go sámegiela vai mearkagiela.
Ulbmil lea álggahit proseassa mii dagaha sámi servodaga rahpaset servodahkan. Prošeavttas galget leat máŋga bargoseminára mat veahkehit nuoraid rievdadit iežaset jurddašanvugiid, ja vejolaččat fuomášahttit ovdagáttuid maid sii eai diehtán ahte sis ledje.
Noereh!
-Lea buorre sámi servodahkii go lea ásahuvvon riikaviidosaš nuoraidorganisašuvdna sámi nuoraid várás, ja danne lea Sámediggi ovdal juolludan ruđaid Noereh! ásaheapmái, dadjá várrepresideanta Laila Susanne Vars.
Noereh! ásahuvvui 2009 golggotmánu gaskkamuttus. Ásahančoahkkimii ledje čoahkkanan badjel 50 sámi nuora Sállirii Romsii. Namma Noereh! mearkkaša nuorat máttasámegillii. Noereh! jođheaddjin lea Susanne Amalie Andersen.
-Buorre prošeakta
Sámediggeráđi mielas lea prošeakta "Cuvket rájáid" maid Noereh! háliida čađahit 2010 čavčča, buorre prošeakta mii lea vuođđuduvvon sámi nuoraid sávaldahkii ahte sámi servodat galgá leat rahpaset, čáhkkilet ja eanet riidoeastadeaddji. Dáid ulbmiliid doarjut mii Sámediggeráđis ollásit, dadjá várrepresideanta Laila Susanne Vars.