Sámi girkoráđđi lea ovttasbarggus golmmain davimus bismagodderáđiin ja Oslo bismagodderáđiin ráhkadan plána sámi girkoeallima várás "Strategiplan for samisk kirkeliv" (sámi girkoeallima strategiijaplána).
Guovddášfáttát leat nannet sámi giella- ja kulturgelbbolašvuođa, rekruteren, sámiide guoski fáttát girkolaš oahpus, girkolaš vuođđoávdnasat sámegillii, áimmahuššat sámi giela, kultuvrra ja árbevieru ipmilbálvalusas, oskooahpus, diakoniijas ja girkomusihkas, sámi girkoeallima dohkálaš organiseren, dárbu čielggadit sámiide guoski áššiid stáhta-girku ođastusas ja kirkolaš álgoálbmotbarggus.
Eanet sámegiella girkus
- Deaŧaleamos lea oažžut julevsámegielagiid ja lullisámegielagiid girkolaš giellavirggiide, muhto lea maid dárbu nannet giellavirggiid davvisámegielas. Sámegiela geavaheapmi girkolaš oktavuođain hukse gullevašvuođa ja eaneda oassálastima girkomeanuide. Danne aiddostahttá Sámediggi man deaŧalaš dat lea ahte buot sámegielat galget gáhttejuvvot dohkálaččat Norgga girkus. Dat mearkkaša ahte sámegielat eai galgga dušše čalmmustahttojuvvot govastatdásis, muhto ahte sihke lulli-, julev- ja davvisámegiella galgá duohtavuođas geavahuvvot girkolaš oktavuođain boahtteáiggis, dadjá ráđđelahttu Vibeke Larsen.
Buorre ahte Girku váldá ovddasvástádusa
Girku lea ja lea leamaš hui deaŧalaš ollu sápmelaččaide. Earret dan ahte dat lea oskoservodat, de lea girku maid leamaš kultuvrralaš ja oskuvaš árbevieruid deaŧalaš gaskkusteaddjin, mii lea čohkken olbmuid iešguđet muttuin eallimis.
- Plána bokte lea Norgga girku váldán ovddasvástádusa das ahte fátmmastit ja bálddalastit sámi girkoeallima iežas organisašuvnnas, ja dát dáhpáhuvvá sápmelaččaid iežaset álgaga, áŋgiruššama ja oassálastima vuođul, ja ahte sámi girkoeallin dan láhkai beassá ovdánit iežas iešlági vuođul, dadjá ráđđelahttu Vibeke Larsen.
Politihkalaš doarjja lea deaŧalaš
- Deaŧalaš lea ahte sámi girkoeallimii addojuvvojit buorit rámmaeavttut, vai sápmelaččat ja dážat ožžot ovttaárvosaš girkoeallima. Dát ovddasvástádus gullá Norgga girkui ja norgga eiseválddiide vaikke vel dálá stáhtagirkoortnet loahpašii ge. Eaktun strategiijaplána čađaheapmái lea politihkalaš dáhttu loktet sámi girkoeallima. Mii doaivut ahte girku ja eiseválddit váldet dán ovdasvástádusa, dadjá ráđđelahttu Vibeke Larsen maŋŋá ráđđečoahkkima Kárášjogas.
Loga eambbo strategiiaplána birra: