Norut Alta lea árvvoštallan duoji áigodaga 2005-2009 doaibmadoarjjaortnega. Árvvoštallan čájeha ahte vuovdinboahtu lea lassánan 117 721 ruvnnus jagis 2005 183 903 ruvdnui jagis 2008.
-Mii leat duhtavaččat dáinna ovdánemiin. Sámedikki mihttomearri duodjeealáhusain lea ovddidit duoji dakkár ealáhussan mii lea eanet gánnáhahtti ja mas iežas ráhkadan gálvvuid johtu stuorru. Árvvoštallan čájeha ahte mii leat lihkostuvvamin, dadjá ráđđelahttu Marianne Balto.
Smávva birrasat
Árvvoštallan čájeha ahte buvttadanbirrasat leat smávvát ja dávjá lea oasseáiggebargu vuođđun.
2005:s dahkkojuvvui ealáhusšiehtadus gaskal Sámedikki ja ealáhusorganisašuvnnaid Sámiid duoji ja Duojáriid ealáhussearvvi dainna ulbmilin ahte ovddidit duoji dakkár ealáhussan mas lea stuorát buvttadeapmi ja gánnáhahttivuohta.
Oassin dán šiehtadussii ásahuvvui 2005:s doaibmadoarjjaortnet daid sámi duojáriid várás, geat ledje organiserejuvvon ovttaolbmofitnodahkan, ja geain lei gálvojohtu mii lei stuorát go 50 000 ru earret lassiárvodivada.
-Min mihttomearri lea oažžut eanet ollesáiggeduojáriid ealáhussii. Mii háliidit vuoruhit ovddidanbarggu ja gealbudeami nu go fidnooahppiortnega, dadjá ráđđelahttu Marianne Balto.
Eanebut áŋgiruššet dujiin
Árvvoštallan čájeha maiddái ahte eanebut leat áŋgiruššan dujiin ja ahte ortnet lea stuorrudan ealáhusa gálvojođu.
-Lea deaŧalaš guorahallat raportta ja árvvoštallat maid sáhtášii bargat vai ealáhus šaddá eanet gánnáhahtti ja boahtteáigásaš, dadjá ráđđelahttu Marianne Balto.
Ođđa šiehtadallamat
Sámediggi ja Sámiid duodji ja Duojáriid ealáhussearvi šiehtadallagohtet ođđa duodjeealáhusšiehtadusa 2011 várás maŋebárgga 17.08.2010.
Ráđđelahttu Marianne Balto dadjá son illuda šiehtadallamiidda, mat galget leat mielde ásahit boahtteáigásaš ja ceavzilis ealáhusa.
Loga ráportta "Duoji doaibmadoarjagiid árvvoštallan 2005-2009"
Loga ráportta "Duoji ovdáneami ekonomiijaráportta"