Sámedikki presideanta Egil Olli lei mielde diđoštallamis Ráiteváris ja Suolomarrasis Kárášjoga gielddas gos Store Norske Gull lea čađahan geahččalanbohkamiid ozadettiin metállaid 2009 geasi.
-Otná báikediđoštallamat čájehit ahte almmá dohkálaš gulahallama ja ovttamielalašvuođa haga gaskal minerálafitnodaga, guovllu geavaheddjiid ja Sámedikki, de čuožžila eahpesihkarvuohta ja lassibargu buot áššeosolaččaide, dadjá Sámedikki presideanta Egil Olli.
Diđoštallamis ledje mielde Store Norske Gull, orohagat 16, Boazodoallohálddahus, Kárášjoga gielda, NORUT ja Norsk institutt for naturforsking (NINA).
-Otná diđoštallan láhčá buori vuođu dasa ahte Store Norske Gull ja orohagat sáhttet čoavdit riidduid diimmá iskanbohtosiid oktavuođas. Mun duođas jáhkán ahte mii ovttas nagodit juksat buori ja geatnegahtti gulahallama jus iskkadeamit jotkojuvvojit, dadjá Sámedikki presideanta Egil Olli maŋŋá diđoštallama.
-Aŋkke ii álggahuvvo ruvkedoaibma guhkes áigái dáin guovlluin. Buot osolaččat dihtet ahte ruvkedoaibma sáhttá dušše dalle čađahuvvot, go dat boahtá buorrin buohkaide ja go buohkat leat ovttamielas dasa, loahpaha Sámedikki presideanta Egil Olli.