Dát golbma gihppaga leat ráhkaduvvon fáttáid vuođul ja áigumuš lea movttiidahttet eanet lullisámegiel doaimmaide. Fáttát Dolla, Muorat ja Láibun/gáhkken válddahallojuvvojit iešguđet gihppagis govaiguin ja lullisámi tearpmaiguin ja cealkagiiguin. Juohke gihppagis leat maid ássái guoski sátnelisttat ja bargobihtát.
- Lea hui buorre go lullisámi oahpponeavvuid lea nu álki buohkaid háhkat lullisámi servodagas geat háliidit oahppat giela. Háliidan rámidit Aajege dán, sin buori ja deaŧalaš barggu ovddas. Mii Sámedikkis doaivut ahte dát prošeakta sáhttá movttiidahttit earáid ge, vai boahtteáiggis ráhkaduvvojit oahpponeavvut maid lea álki háhkat, dadjá sámediggeráđđi Ellinor Marita Jåma.
Dán golbma gihppaga sisdoallu:
Dålle/ Dolla.
Gihppaga fáddán lea dolla. Gihppagis leat sihke fáktateavsttat ja čáppagirjjálašvuođateavsttat oktan govaiguin. Dolla lea guovddážis ja árbevirolaččat deaŧalaš sápmelaččaide ja eará álgoálbmogiidda. Gihppagis válddahallojuvvojit muhtun rávvagat, bargovuogit ja biergasiid ja bargamušaid sánit. Dáid sáhttá geavahit sihke giellaoahpaheamis ja diehtun go bargá fáttáin.
Moerh/ Muorat.
Gihppaga fáddán lea muorat. Gihppagis lea iešguđetlágan muoraid govat oktan fáktateavsttaiguin. Das leat oppalaš dieđut muorrašlájaid birra, muhto maiddái erenoamáš namahusat muora iešguđet osiin. Gihpa válddahallá maiddái mo ja masa muorra sáhttá geavahuvvot. Gihpa áimmahuššá maiddái sámi árbedieđuid iešguđet kultuvrralaš beliid. Gihppaga sáhttá geavahit ii dušše giellaoahpaheamis, muhto maiddái fágaidgaskasaš fáddáoahpahusas fáttáin sámegiella ja luonddufágat.
Bååhkesjidh/ Láibun/gáhkken.
Gihppaga fáddán láibun/gáhkken. Gihppagis leat fáktateavsttat oktan govaiguin, mat válddahallet láibuma/gáhkkema. Laejpie/ gaahkoe, mii lea duolba, dipma láibi, lea deaŧalaš oassi sápmelaččaid árbevirolaš biepmus. Gihpa válddahallá bargovuogiid ja biergasiid ja bargamušaid sániid. Das lea maid ođđa diktejuvvon lávlla láibuma/gáhkkema birra. Gihppaga sáhttá geavahit giellaoahpaheamis, muhto maiddái fágaidgaskasaš fáddáoahpahusas fáttáin sámegiella ja borramušat ja dearvvašvuohta.
Gihppagiid sáhttá viežžat Aajege neahttasiiddus www.aajege.no.