ČálliidLágádus dat háliida almmuhit Johan Turi girjji "Muitalus sámiid birra" ávvu- ja hearvagirjin.
100 jagi boaris
Dál lea vássán 100 jagi dassážiigo "Muitalus sámiid birra" almmuhuvvui.
Johan Turi lei vuosttaš sápmelaš gii čálii girjji sámegillii. Dánskalaš Emilie Demant Hatt ávžžuhii Turi čállit girjji, ja son jorgalii dan maŋŋá dánskkagillii.
Girji lea maid jorgaluvvon ruoŧagillii, duiskkagillii ja eaŋgalasgillii. Nu go Turi ieš čállá, de lea son sápmelaš guhte lea bargan buot bargguid sámi eallimis, ja dán sámi árgabeaivvi son válddahallá hui eallin girjjis.
Sámi klassihkar
ČálliidLágádus háliida almmuhit hearvagirjji 100-jagi ávvudeami oktavuođas. Almmuhus lea áibbas ođđa veršuvdna mii lea ráhkaduvvon Johan Turi iežas giehtačállagiid vuođul.
Romssa universitehta professor Mikael Svonni lea guorahallan giela. Girjji doaimmaheaddji lea girjjálašvuođadutki Harald Gaski, Romssa universitehtas.
Girji lea klassihkar, ja geavahuvvo sámegiel oahpahusas buot dásiin buot golmma davviriikkain. Almmuhus čuovvu dálá riektačállima, ja doaimmaheaddji lea čállán epiloga.
Máŋga veršuvnna
ČálliidLágádus áigu maiddái almmuhit "Muitalus sámiid birra" ođđadárogillii ja eaŋgalasgillii, maid vuođđun lea sámegiel originála. Buot golbma veršuvnna leat hearvagirjjit, ja main leat maiddái máŋga sárguma, maid Turi ieš lea sárgun. Áigumuš lea girjji almmuhit stuorra riikkaidgaskasaš Johan Turi-semináras Romssa universitehtas.
-Lean lohkan girjji ja illudan ođđa almmuheapmái. Mii sávvat ČálliidLágádussii lihku bargui, dadjá Sámedikki presideanta Egil Olli.