- Dat čielggadanbargu mii galgá álggahuvvot lea stuoris ja viiddis ja dat lea deaŧalaš sámi servodaga viidáset ovddideapmái viiddis perspektiivvas, deattuha Sámedikki várrepresideanta Laila Susanne Vars.
Lávdegoddi galgá čilget mainna lágiin dutkan ja alit oahppu sáhttá bidjat eavttuid sámi servodaga ovddideapmái ja váikkuhit dan. Dan oktavuođas galgá lávdegoddi maiddái guorahallat rekrutterendili sámi alit ohppui vuođđun servodatovddideapmái ja nana dutkanbirrasiid huksemii.
Lávdegoddi galgá maiddái árvvoštallat Sámi allaskuvlla ovdáneami dieđalaš allaskuvlan ja viidáset álgoálbmotuniversitehtan. Lávdegotti mandáhtii gullá maiddái evttohit doaibmabijuid sámegiela nannemii dutkangiellan.
Davviriikkalaš ovttasbargu
- Mii Sámedikkis leat hui duhtavaččat lávdegotti fágalaš čoahkkádusain. Erenoamáš buorre lea dat go sámi dutkan ja alit oahpu lávdegottis lea visotsámi perspektiiva, mas sihke Ruoŧŧa ja Suopma leat mielde, dadjá loahpas várrepresideanta Laila Susanne Vars.
Lávdegotti jođiha Olmmošvuoigatvuođaid guovddáža direktevra, Nils A Butenschøn. Eará lahttun leat: Kari Morthensen (Dutkanráđđi), Nils Oskal (Sámi Allaskuvla), Per Ravna (Høgskolen i Bodø), Johan Strømgren (Uppsala Universitehta/ Sámi Allaskuvla), Else Grete Broderstad (Romssa universitehta) ja Anni- Siiri Länsman (Oulu universitehta).
Lávdegoddi galgá geiget čielggadusa 31.12.2011.